L'Sporting, a un pasu del infiernu

|

Tolo malo que podía ocurrir n'El Molinón sucedió. Derrota énte l'Espanyol dando una imaxe d'impotencia y cola certeza que'l vivir de les rentes acabóse. El descensu ta a namás un puntu y yá nun queda más marxen pa errores. O los asturianos entamen a sumar puntos o l'equipu acaba en segunda.

Bien se puede dicir que'l resultáu foi enforma abultáu pa los méritos que fixeron los espanyolistes, si bien tamién sería inxusto dicir que l'Sporting mereció la victoria. Mientres que los catalanes de les cuatro veces que llegaron a portería marcaron tres goles, los asturianos a ratos fixeron oportunidaes mas o menos clares de gol, pero ensin desplegar un gran xuegu, colos xugadores ensin les idees clares y con un rematador como Bilic, que fixo lo que pudo, pero que ta n'hores baxes. Y ye qu'enfrente tenía un equipu ordenáu, onde cada xugador sabía que tenía que facer y cómo, y nel que De la Peña foi'l referente y distribuidor del xuegu.

L'Sporting entamó'l partíu atacando, queriendo resolver l'encuentru lo mas llueu posible. Sicasí, les aproximaciones al área visitante nun llegaron cola contundencia esperable. Sería l'Espanoyl, na so primer llegada clara, el que marcaría nel minutu 24 gracies a un disparu de Nené, que taba llibre de marca, tres un centru de Moisés.

Na segunda parte l'Sporting pegó l'arreón intentando l'empate, que tuvo a puntu d'algamase gracies a un disparu fortísimu de Carmelo dende fuera del área que sacó Kameni cuado yá entraba pela escuadra. Neru tendría otra oportunidá tres rematar fuera por mui poco un centru de Lora, cerebru del equipu poles baxes de Michel y Matabuena. Pero como vien siendo norma nesta temporada, col equipu arriba l'Espanyol, que nun perdía la compostura, aprovecharía un contrataque pa marcar el 0-2 gracies a un tiru de Román tres un pase de Luís García depúes de qu'esti descolocare a tola defensa, porteru incluyíu. Dos minutos depúes llegaría'l tercer y definitivu gol, obra de Callejón, n'otru contragolpe que pilló descolocada a la defensa local. A partir d'esi momentu fue un querer y non poder del Sporting, encima con un home menos tres la espulsión por roxa directa a Barral por supuesta agresión a un defensa espanyolista.

Con esta nueva derrota l'Sporting da-y fuelgu al Espanyol, pierde amás el gol average colos catalanes y asitia a un puntu del descensu. Pa los asturianos yá nun hai mas tiempu. O se sumen puntos yá o l'añu que vien el nuesu país queda ensin fútbol de primera. L'únicu datu positivu ye que l'Sporting entá depende de si mesmo. Tien na so mano la posibilidá de salvase. Y esti domingu espera l'Atléticu de Madrid nel Calderón.

Ficha técnica

Sporting de Xixón 0-Espanyol 3

Sporting
: Lafuente, Sastre (Cámara m 45), Gerard, Neru, Canella, Diego Camacho, Lora, Luis Morán(Barral m 45), Carmelo (Pedro m 73), Diego Castro y Bilic.

Espanyol: Kameni, Sergio Sánchez, Jarque, Pareja (Torejón m 83), David García, Moisés, De la Peña (Román m 51), Luis García, Iván Alonso, Nené y Tamudo (Callejón m 65)

Goles: 0-1 Nené (m 24), 0-2 Román (m 72), 0-3 Callejón (m 74)

Árbitru: Ayza Gámez. Espulsó a Barral (m 75) y sacó tarxetes a amarielles a Cámara (m 54) y Diego Camacho (m 72).

Comentarios

Prestábame tener razones pal optimismu pero viendo la trayectoria del equipu y la sensación d'impotencia que tresmite veolo mui complicao. Fallón n'ataque y cola mesma defensa de segunda por mor de la cabezonería d'unos y la racanería de quien tien secuestráu al Sporting dende hai 15 años y que vive cómodamente en Marbella.
Sólo queda encomendanos al milagru de llegar polo menos con opciones al últimu envite frente al Recre. 

Contador Estadistiques