Día del Llibru Asturianu

Valledor va continuar como diputáu d'IU-BA-LV calteniendo una actitú "coherente" cola masa social y los votantes

|

El diputáu d'IU-BA-LV na Xunta Xeneral del Principáu, Francisco Javier García Valledor, manifestó güei que nun va dimitir como diputáu de la coalición, anque señaló que va siguir cola mesma actitú "coherente" colos plantegamientos de la masa social del partíu y de los sos votantes.
 
"En nengún momentu me plantegué pasar al grupu mistu porque considero'l tresfuguismu como dalgo degradante dende'l puntu de vista políticu y moral", señaló'l diputáu d'IU-BA-LV.
 
Valledor realizó estes manifestaciones demientres la rueda prensa qu'ofreció na Xunta Xeneral del Principáu tres aconceyase cola comisión executiva de la coalición poles diferencies ente'l diputáu y les decisiones del partíu.
 
L'ex conseyeru de Xusticia na llexislatura anterior presentó ayeri un escritu de renuncia al acta de diputáu a la executiva'l partíu nel que "sólo falta poner la fecha pa que la executiva de la coalición la faiga efeutiva cuando crea conveniente", señaló.
 
Valledor renunció a presentar la so dimisión pa "tratar d'asumir el compromisu que tomó la coalición y colos electores" y decidió incorporase a la executiva d'IU d'Asturies, pa treslladar "con mayor claridá" les sos decisiones y propuestes. "Vamos intentalo", apuntó.
 
El diputáu d'IU-BA-LV consideró "evidente" que les decisiones se deben adoptar dientro de la coalición, anque afirmó que va siguir entendiendo la política como "una actividá de compromisu, que se debe exercer siempre con dignidá y coherencia".

Comentarios

Como esto siga asina, van tener qu'invertir les sigles, en cuenta IU, van tener que pone-y ¡UI!

Gabis

Contador Estadistiques