El Padre Ángel, medaya d'oru d'Asturies

El Gobiernu decidió esta mañana les medayes coles que'l país premia los méritos de persones y instituciones en beneficiu de los intereses d'Asturies. La d'oru va ser pal Padre Ángel.

El presidente y fundador de Mensajeros de la Paz, nacíu en Mieres nel añu 1937, trabaya pa  favorecer el nivel de vida de comunidaes y meyorar los aspeutos asistenciales de la población más desfavorecida en países en desarrollu. De fechu, anguaño ta en Xordania col oxetivu de trayer al Estáu español a persones evacuaes de Gaza, territoriu castigáu polos ataques continuos d'Israel contra'l pueblu palestín cola escusa d'acabar colos túneles de Hamas, provocando más de 1.700 muertos, munchos d'ellos neños y muyeres.

El Conseyu de Gobiernu aconceyáu güei tamién decidió conceder seis medayes de plata a Tomás Casado, María Ángeles Gil Álvarez, la Fundación Sanatorio Adaro, José Ramón Badiola, Emilio Serrano y Manuel Fernández 'Lito', ésta última a títulu póstumu.