La XDLA pide a PSOE y PP qu’afiten a la RTPA como ferramienta de normalización social del asturianu

Tres les propuestes de Foro y IX al traviés d'enmiendes parciales a la llei de la reforma de l'alministración pública que va regular la RTPA, la Xunta pola Defensa de la Llingua Asturiana (XDLA) pide a la FSA-PSOE y al PP qu’afiten a la radio y televisión públiques como ferramientes de normalización social del asturianu. El vienres, los votos de PSOE y PP, y l'astención d'IX, valtiaron les enmiendes a la totalidá de Foro y UPyD a la norma nueva, y les siguientes a tratar na Xunta Xeneral son les parciales, nes que tán les de la coalición y les del partíu lideráu por Francisco Álvarez-Cascos.

 

Pa la organización cívica, RTPA ye "un mediu públicu que, d’alcuerdu cola llexislación vixente –Estatutu d’Autonomía y la Llei d’Usu del Asturianu–, tien qu’usar y fomentar l’usu del idioma". Sicasí, "la dexadez de funciones de los gobernantes, oposición y dirección de RTPA despreció hasta’l momentu la llexislación autonómica", aseguró nun comunicáu.