El 49 por cientu de los llectores d’Asturies.com cree que’l bipartidismu va trunfar nes Europees

El PP y el PSOE van siguir dominando nes urnes. Asina opina’l 49 por cientu de los llectores d’Asturies.com, por un 40 por cientu que ve a los partíos de creación nueva y coaliciones como beneficiaos grandes de les Europees del domingu.

 

En plenu procesu de descomposición del bipartidismu, qu’impera nel Estáu dende l’afitamientu de la Democracia, por mor de la crisis y de la indignación d’una parte importante de la población poles sos polítiques, les eleiciones al Parllamentu Européu del domingu tovía van ser dominaes de manera amplia pol PP y el PSOE, según opina un 49 por cientu de los usuarios d’Asturies.com que participaron nel nuesu ‘Conceyu Abiertu’. Por contra, un 40 por cientu considera que los partíos de nueva creación, como Podemos, o les coaliciones, como Los Pueblos Deciden, Primavera Europa o Coalición por Europa, van ser los beneficiaos d’esta cita coles urnes. Mentes, un 11 por cientu considera que los votos que pierdan el PP y el PSOE van recoyelos les dos alternatives más clásiques, Izquierda Unida, que se presenta como La Izquierda Plural xunto con otres formaciones, y UPyD.