Planeta terrestre descubiertu nel sistema Gliese 581

Los investigadores del Observatoriu Européu Austral, ESO, tán acabantes d'anunciar nuna rueda de prensa cellabrada esta mañana el descubrimientu d'un planeta asemeyáu al nuestru. De fechu, sigún los datos, esti ye'l exoplaneta más pequeñu atopáu hasta la fecha.
 
El perconocíu investigador nel campu de los exoplanetes Michel Mayor anunció güei'l descubrimientu del exoplaneta más llixeru de tolos anteriormente atopaos. El planeta "e", nel famosu sistema solar Gliese 581, tien solo dos veces más masa que la tierra. L'equipu investigador refinó tamién la órbita del cuerpu Gliese 581 "d", situándola dientro de la nomada "zona d'habitabilidá" onde océanos d'agua líquido puen esistir. Sigún una miembru del equipu, Stephane Udry "ye'l primer candidatu seriu a ser un mundu d'agua". Esti descubrimientu achaplante ye'l resultáu de más de 4 años d'observaciones usando'l cazaor de planetes con poca masa que más resultaos ta dando-y a la ciencia, l'espectrógrafu HARPS, amestáu al telescopiu de 3.6 metros que tien la ESO en La Silla, Chile.
 
El planeta "e" del sitema Gliese 581 orbita a la estrella que lu agospia- localizada a 20.5 años lluz en dirección a la constelación Llibra- en namás que 3.5 díes. "Con solo 1.9 mases terrestres ye'l planeta más lixeru de los atopaos enxamás fuera del sitema solar", sigún afirmó el coautor de la investigación Xavier Bonfils, del Observatoriu de Grenoble.

Tando tán cerca de la estrella'l planeta nun puede ser habitable, pero otru cuerpu d'esti mesmu sistema si paez que lo ye. Frutu de previes observaciones esta estrella ye conocía por caltener un sistema planetariu con un astru del tamañu de Neptunu (ESO30/05) y dos supertierres (ESO22/07).

L'Observatoriu Européu Austral ye una institución internacional creada en 1962 col envís de facer investigaciones astronómiques d'envergadura dende'l hemisferiu sur terrestre. Ta formaú por 14 paises: Austria, Bélxica, República Checa, Dinamarca, Francia, Finlandia, Alemania, Italia, Holanda, España, Suiza, Suecia, y el Reinu Uníu. ESO lleva alantre un programa ambiciosu de diseñu, construcción y operación de potentes centros d'observación en tierra puestos a disposición de la comunidá científica.
 
Fonte: http://www.eso.org/public/outreach/press-rel/pr-2009/pr-15-09.html