Multes d'ente 150 y 240 euros pa los 14 antifacistes acusaos de desordes públicos en Cangues d'Onís

Los 14 mozos antifacistes acusaos de cometer desordes públicos en Cangues d'Onís en setiembre del 2005, demientres  los incidentes previos a una concentración de la organización Democracia Nacional, van tener que pagar multes d'ente 150 y 240 euros. El pidimientu fiscal yera de penes d'ente ún y cuatro años y mediu de cárcel.
 
La defensa de los 14 acusaos llegó esta mañana a un acuerdu col fiscal enantes d'entamar el xuiciu, polo que'l procesu, que taba previsto que durare tola selmana, nun llegó a celebrase.
 
Según fontes de la defensa, de primeres, la propuesta de conformidá de l'acusación rebaxaba'l pidimientu a penes de seis meses de prisión menor pa 13 de los acusaos, y un condena superior pa otra implicada. Tres diverses negociaciones, llegóse a un acuerdu pol que se suprimíen los delitos penales por 13 faltes de desordes y una falta de desordes y lesiones. Les  multes son d'un mes, a razón de cinco y ocho euros por día, según la situación económica de los sancionaos.
 
Les mesmes fontes mostraron la so satisfaición, y consideraron que'l fiscal, con esta midida, reconoció que'l so pidimientu yera desproporcionáu.
 
Los 14 acusaos resultaron deteníos, xunto con otres diez persones, demientres los enfrentamientos que tuvieron llugar el 10 de setiembre del 2005 en Cangues, ente un grupu d'antifacistes y efeutivos de la Guardia Civil. El motivu yera una concentración autorizada del grupu Democracia Nacional, que se diba celebrar na Plaza de Pelayo de Cangues d'Onís, la cual, delles organizaciones sociales, polítiques y sindicales tacharon de "racista y facista". Por esti motivu, convocaron una concentración una hora enantes nel mesmu escenariu, pero nesti casu sin autorización, lo que motivó la carga policial a la que siguieron duros enfrentamientos peles cais del pueblu.