SUATEA critica la "hipocresía" d'Educación y recuerda'l so "maltratu permanente" a la materia d’asturianu

L’anuncia fecha por Ana González de que’l so departamentu prepara la documentación pa pidir la especialidá d’asturianu ye calificada d’hipócrita por SUATEA. El sindicatu nun escaez el “maltratu permanente” que sufre la materia.

 

“La Conseyería y el Gobiernu asturianu pretenden agora mangase la medalla de grandes defensores de la llingua del país, cuando la rialidá ye que la política de l’actual Conseyería d’Educación ye la del maltratu permanente a la materia, a quien la imparte y a quien la recibe”, espresa nun comunicáu la secretaría de Llingua Asturiana del Sindicatu Unitariu Autónomu de Trabayadores del Enseñu n’Asturies (SUATEA). Asina, recuerden “la xeneralización de les medies xornaes, horarios antipedagóxicos, males artes pa desincentivar la matriculación de los estudiantes, desamparu permanente...”, asuntos que s’achacaben en bona parte “a l’ausencia d’una especialidá docente tanto en Primaria como en Secundaria que dignificara la materia y estabilizara’l so profesoráu al traviés d’un procesu de concursu-oposición, yá que’l 95 por cientu del mesmu ye personal interín. La rialidá ye que, siendo la especialidá imprescindible p’avanzar na dignificación, la Conseyería d’Educación pudo y puede facer muncho más pola escolarización de la llingua asturiana”. Nesi sen apunten que “abulta paradóxico, por nun dicir hipócrita, que pretendan agora dir de defensores del idioma cuando hubo que llevalos a los tribunales pa facelos cumplir la Llei d’Usu de 1998”.

 

D’igual forma, el sindicatu educativu critica’l “autobombu” de la conseyera por mor de la Selmana de les Lletres Asturianes y recuerda-y cómo’l so Gobiernu “ta afogando económicamente a la institución cimera de les lletres asturianes, l’Academia de la Llingua, cola falsa sida de la crisis”. Tamién apunta que “la igua rial al problema de la llingua asturiana y del gallego-asturiano, tanto dientro como fuera de la educación, pasa inevitablemente pela so oficialidá, que, de pasu, serviría pa cumplir el mandáu de la Constitución de 1978, o de la Carta Europea de les Llingües Minorizaes de la que’l Reinu d’España ye firmante”.

 

Una demanda vieya