Gonzali Producciones pon una encuesta en Facebook sobre la película siguiente n'asturianu qu'emitirá TPA

La productora responsable de la versión asturiana de 'One-eyed Jacks', tornada al nuesu idioma como 'El rostru impenetrable' y emitida en TPA con un ésitu perimportante de públicu, yá trabaya no que va ser la película siguiente doblada al asturianu que podrá vese nel ente públicu de comunicación. Asina, tres estudiar el catálogu de filmes de la Federación d'Organismos de Radio y Televisión Autonómicos (FORTA), Gonzali Producciones fixo una preseleición con tres títulos: 'Julie y Julia', 'Tolos homes del presidente' y 'L'amor tien dos cares (The mirror has two faces)'.

 

La primera trátase d'una comedia basada en fechos reales dirixida nel 2009 por Nora Ephron y protagonizada por Meryl Strep y Amy Adams, mentes que la segunda ye una película d'intriga que se rodó nel 1976 baxo'l mandu de Alan J. Paluka, con un repartu encabezáu por Robert Redford y Dustin Hoffman, y que cuenta la historia de los periodistes que destaparon el casu Watergate. Completa la preseleición el 'remake' 'L'amor tien dos cares', comedia romántica que dirixó Barbara Streisand nel 1996 que protagoniza la conocida actriz estauxunidense y Jeff Bridges.

 

Tolos usuarios de Facebook pueden votar pola so preferencia na páxina de Gonzali Producciones nesta rede social. La encuesta va zarrase'l 5 de mayu.