La XXXV Selmana de les Lletres Asturianes va principiar el vienres con un actu n’A Caridá

‘Dibuxando un camín’ ye’l nome que recibe la trixesimoquinta edición de la Selmana de les Lletres Asturianes, dedicada nesta ocasión al mundu del cómic. Ésta va principiar el vienres n’A Caridá con un ‘Homenaxe ás nosas lletras’.

 

El programa entamáu esti añu pola Conseyería d’Educación, Cultura y Deporte inclúi actos institucionales, conciertos, actuaciones, recitales, actividaes escolares y la espublización de ‘Dibuxando’l camín’, obra que consta de cuatro histories gráfiques feches de manera especial pa esta ocasión polos ganadores del Premiu Alfonso Iglesias –Ruma Barbero, Isaac Rivero, Javier Antonio Marinas y Alfonso Zapico– y que va regalase’l Día de les Lletres Asturianes (9 de mayu), xornada na que tamién se celebra’l Día del Llibru y el Discu n’Asturianu, con cada compra que se faiga d’artículos en llingua asturiana en sesenta llibreríes del país. Toos van tener, amás, un 10 por cientu de descuentu nesa xornada, na que l’Academia de la Llingua Asturiana celebra la so xunta estraordinaria nel Teatru Campoamor. Una hora enantes, a les 19.30 hores, la Xunta pola Defensa de la Llingua Asturiana convoca la yá tradicional manifestación, con salida de la estación del Norte (RENFE), pa demandar el derechu que se-y niega al pueblu asturianu: la oficialidá.

 

El primer actu de la XXXV Selmana de les Lletres va mirar a occidente, con un ‘Homenaxe ás nosas lletras’ n’A Caridá, en concreto nel Auditorio da Casa das Quintas (19.30 hores). Ésti va constar d’una llectura pública institucional d’obres en gallego-asturiano, la presentación del númberu cincu de ‘Tratabel. Revista eonaviega de lliteratura’ y un conciertu de Mestura. El llunes 5, mentes, grupos d’escolinos van poder disfrutar d’ópera n’asturianu nel Teatru de la Llaboral (11 hores) cola obra de Producciones Nun Tris ‘Los amorinos de Bastón y Bastiana’, tando programada pela tarde la yá tradicional collaboración na Capiella de los Dolores de Grau (19.30 hores) cola Fundación Aula de les Metáfores. Nesta ocasión, ta previstu un actu poéticu-musical de nome ‘La poesía asturiana nueva’, na que participen los poetes Sofía Castañón, Vanessa Gutiérrez y Pablo Texón, y la cantante Marisa Valle Roso. Darréu va celebrase la entrega de diplomes del I Premiu de Poesía Selmana de les Lletres, nel que participaron alumnos y alumnes de Primaria y Secundaria del Conceyu de Grau.

 

El martes, al meudía, tres una visita guiada pela Xunta Xeneral colos alumnosdel IES Santa Cristina de Ḷḷena –centru de Secundaria con más porcentaxe d’eleición de l’asignatura optativa Llingua Asturiana y Lliteratura–, va tener llugar la llectura institucional por motivu de la Selmana de les Lletres, mentes que pela tarde, a les 18.30 hores nel salón d’actos de la Biblioteca d’Humanidaes de la Universidá d’Uviéu, van presentese los cinco llibros ganadores de los Premios Lliterarios 2013, actu al que va siguir un alderique colos autores. El miércoles, la Llaboral va acoyer, a partir de les 18 hores, la gala d’entrega de premios del II Certame de Teatru Escolar en Llingua Asturiana/Gallego-asturiano, y el xueves, a les 12 hores, l’IES de Llanes va ser sede del actu escolar de la Selmana de les Lletres nel que va entregase’l XIX Certame de Creación Artística/Lliteraria, el XI Certame de Cartelismu, el II Certame de Creación Audiovisual y el Certame Especial de Cómic pa les Etapes d’Educación Primaria, Educación Secundaria y Bachilleratu.

 

125 años de la primer viñeta en llingua asturiana

 

Avilés, en concreto l’Antigua Pescadería Municipal, repite per segundu añu como llar de la Feria del Llibru y Discu n’Asturianu, que va inaugurase’l xueves a les 18 hores con un actu nel que van tar presentes tolos autores que participen en ‘Dibuxando un camín’, anque yá va tar abierta al públicu dende les 11 hores. L’horariu d’esti mercadín va ser de 11 a 14 hores y de 17 a 21 hores, de xueves a sábadu, mentes que’l domingu va caltenese abiertu de manera continuada de 11 a 19 hores.

 

El vienres va preestrenase nel Teatru de la Llaboral (11 hores) la obra de Nacho Fonseca ‘Nora, Mauro y los suaños’, eventu acutáu pal alumnáu de Primaria na que participen la Orquesta Sinfónica del Principáu d’Asturies, el Coro Infantil de la Fundación Príncipe de Asturias, el Conservatoriu Profesional de Música de Xixón y la Escuela Superior d’Arte Dramáticu del Principáu d’Asturies. El públicu en xeneral va poder disfrutar d’esta creación el sábadu a les 19 hores –entrada llibre hasta completar aforu–, actividá que va poner el ramu a esta Selmana de les Lletres dedicada al cómic por motivu del 125 aniversariu de la espublización na revista ‘La Comedia Gijonesa’ d’un cuentu popular firmáu por Pepe Priendes baxo’l nome ‘Un cuento viejo’. Esta historia, contada en cuatro viñetes, llevaba un testu n’asturianu nel pie de caún d’elles, polo que se considera’l primer cómic fechu na llingua del país.