Les eleiciones europees del 25 de mayu nun xeneren ilusión nenguna a los llectores d’Asturies.com

Queda poco más d’un mes pa les eleiciones al Parllamentu Européu, una cita coles urnes na que los llectores d’Asturies nun tienen puestes munches esperances. Sicasí, un 68 por cientu piensa dir a votar el 25 de mayu.

 

En concreto, un 27 por cientu de les persones que participaron nel nuesu ‘Conceyu Abiertu’ afirma sí tar ilusionáu coles eleiciones, por un 73 por cientu qu’apunta lo contrario. Mentes, un 41 por cientu del total afirma que pese a nun tener munches espeutatives sí va a acudir a les urnes, y un 32 por cientu piensa aprovechar la xornada pa otros menesteres. Esi 68 por cientu de los nuesos llectores que tien en mente votar van poder escoyer ente les opciones tradicionales de calter estatal, a les qu’hai que sumar la candidatura de Podemos, que cuenta col sofitu de Compromisu por Asturies; la de Foro, que va en solitariu; y la de ‘Asturies decide. Los pueblos deciden’, coalición d’Andecha Astur con EH Bildu, BNG, Puyalón de Cuchas, Unidad del Pueblo y Alternativa Nacionalista Canaria.

 

Dende esti momento, los usuarios d’Asturies.com pueden participar nun ‘Conceyu Abiertu’ nuevu. Nesta ocasión queremos saber si creen que la direición de la RTPA ta dando un xiru no que respeuta a la presencia del asturianu nel ente públicu de comunicación tres incorporar a la parrilla de la RPA un boletín de noticies diariu de 10 minutos n’asturianu y el programa sobre ociu ‘Qué facer’ –a lo qu’hai que sumar la retresmisión d’ un partíu de Lliga del Uviéu– o la emisión de ‘El rostru impenetrable (One-eyed Jacks)’ na TPA.