IU alvierte, énte la posición de Valledor, que les decisiones de la direición comprometen a toos

La Executiva d'IU d'Asturies caltuvo un conceyu nel que se trató la situación xenerada na formación política y nel so grupu parlamentariu na Xunta Xeneral depués de que'l diputáu Francisco Javier García Valledor s'apartare de la disciplina de partíu nuna votación.
 
   Tres el conceyu, la organización manifestó que "les decisiones que tomen los órganos de decisión d'IU comprometen a toos y fixen la posición y la estratexa política que deben defender tolos representantes institucionales de la organización".

   Esta Comisión Executiva celebróse dempués de que nel Plenu del día 3 d'abril, nuna votación relativa a una proposición sobre'l personal docente presentada pol PP, IU-BA-Verdes acordó votar a la so escontra, d'acordies colos socialistes. Valledor nun quiso nin siquier defender la posición del so grupu.

   Dempués, el diputáu señaló que lo ficiere por "coherencia", dao que la iniciativa del PP yera una copia d'una presentada previamente por IU. Asina, señaló que s'abría un periodu de reflexón, tanto pa él como pa la organización, pa decidir si continúa col escañu na Xunta Xeneral del Principáu o lu abandona.

   La Comisión Executiva d'IU manifestó güei l'apoyu a les posiciones del grupu parlamentariu que treslladó na Xunta Xeneral los acuerdos adoptaos pola direición.

   De la mesma manera, dexó claro que se trata d'una "organización democrática, respetuosa dafechu cola pluralidá política, na que les decisiones se tomen de manera colectiva al traviés d'unos órganos de decisión colexaos".

   De la mesma manera, la Comisión Executiva va convocar un conceyu la próxima selmana con tolos miembros del grupu parlamentariu col oxetivu de garantizar la impresdible unidá, cohesión y llealtá política de tolos miembros d'IU nel Parlamentu asturianu.