Los cantares en chigre van ser protagonistes esti sábadu en Noreña

Esti sábadu va celebrase la sesta edición del certame ‘Prohibido cantar..., desentonáu’ qu’entama la Banda Gaites de Noreña na villa. Diez rondes de dellos puntos d’Asturies van animar los chigres a partir de les 21.30 hores.

Enantes, a les 20.30 hores, va tener llugar la presentación oficial d’esta edición na Casa la Cultura de Noreña. “El certame pretende la recuperación de les rondes, manifestaciones populares espontánees qu’aconceyaben pa cantar en cualisquier celebración, aguilandos, fiestes, cortexos o simplemente p’alternar colos amigos y vecinos”, apunten dende la organización, que recuerda que “estes agrupaciones yeren un mediu pa les interaiciones sociales, favorecíen rellaciones amistoses ente unes persones y otres, y calteníen vivo la nuesa cultura popular”, siendo los chigres los sos espacios tradicionales de conceyu.

Un total de diez rondes van participar nesta ocasión en ‘Prohibido cantar..., desentonáu’, anque “la meyor ronda ye na que participen tolos presentes”, polo que s’anima a arrancase a tol mundu. La distribución per chigres fecha esti añu ye la siguiente: la Bandina Lieres, nel Villa Condal; Fitoria, n’El Rincón del Güelu; Brisas de Aguilar, na Sidrería Casa Manolo (Hotel Cristina); Santa Apolonia, en La Sala; Tino Fombona, en Ca Sabil; San Félix, en Fermín; Coro Alfredo de la Roza, en La Tenería; Terturlia Peña Careses, nel Paco; el Coro Errante, nel González; y l’Agrupación Musical Solvay, en La Cuadra de Alfredo. Amás, tamién van participar Fernando Valle Roso y Héctor Braga, y Anabel Santiago y David Varela, amás de la Banda Gaites de Noreña, pa dar tovía más ambiente al certame.