El meyor cantar del 2013 decídese esti vienres nel Teatru de la Llaboral

Esti vienres va celebrase nel xixonés Teatru de la Llaboral la gala del VIII Premiu al Meyor Cantar. Rafa Lorenzo, Vrienden, la Banda de Gaitas El Trasno y Silvia Quesada van defender los sos temes a partir de les 20.30 hores.

Les canciones candidates a resultar gallardonaes como meyor cantar n’asturianu o gallego-asturiano del 2013 son ‘Ente mazanos’ (Rafa Lorenzo), ‘Vivu en dalgún llugar’ (Vrienden, con lletra de Xurde Fernández), ‘Volviche’ (Grupo de Gaitas El Trasno, de Cuaña, con lletra de Xosé Miguel Suárez Fernández ‘Tapia’ y voz del cantante del grupu xixonés Maurizios, Kike Dembinsky) y ‘La pena abierta’ (Silvia Quesada, con lletra d’Alfredo González). Amás, mientres el xuráu decide’l ganador, va actuar Taranus, vencedor l’añu pasáu col tema ‘Ensin ti’.

El ganador d’esti añu, a diferencia d’ediciones pasaes, nun va participar nel Liet International, festival européu de canciones en llingües minorizaes que paez que nun va celebrase tampoco esti añu tres suspendese nel 2013 por decisión unillateral de la Cullittività Tarrituriale di Corsica cuando yá taben confirmaos el representante frisón, lapón y asturianu, que diba a ser Taranus. La recompensa del VIII Premiu al Meyor Cantar va ser una escultura orixinal y promoción dende’l Gobiernu al traviés de los medios de comunicación, amás de la participación n’eventos entamaos pola Alministración.

La entrada a la gala d’esta tarde, que se va emitir mañana en diferíu en TPA a partir de les 18.30 hores, ye llibre.