El cantar ‘Volviche’, d’El Trasno, y el discu de Vrienden, gallardonaos colos Premios AMAS en categoría folk

Dos de los finalistes del VIII Premiu al Meyor Cantar, que va celebrase’l vienres na Llaboral, resultaron gallardonaos colos AMAS de categoría folk. ‘Volviche’, d’El Trasno, ganó como meyor cantar y Vrienden llevó’l títulu de meyor discu.

Los artistes y bandes nominaes de los Premios Anuario de la Musica en Asturias (AMAS) conocieron el resultáu de les votaciones, entamaes per Internet, el vienres nel trescursu d’una gala celebrada nel uviedín Teatru Filarmónica. El grupu ‘heavy’ WarCry resultó ún de los protagonistes de la nueche al llevar l’AMAS de meyor discu rock, por ‘Inmortal’, amás del de meyor portada y diseñu, fechu por Daniel Alonso. Los otros foron la Noite Celta de Porcía, René de Coupaud y Carlos Jeannot –a títulu póstumu–, que recibieron los AMAS honoríficos.

De la ceremonia hai que destacar tamién los trunfos na categoría folk de la Banda Gaitas El Trasno y de Vrienden. Los de Cuaña llevaron el premiu a la meyor canción por ‘Volviche’, y los de Nava’l de meyor discu pol so trabayu homónimu. Estes dos formaciones son finalistes del VIII Premiu al Meyor Cantar, que celebra la so gala’l vienres nel Teatru de la Llaboral, eventu na qu’El Trasno va defender ‘Volviche’ y Vrienden ‘Vivo en dalgún llugar’. Pa esti premiu qu’escueye’l meyor tema del 2013 n’asturianu y gallego-asturiano van competir con cantares con formaciones d’otros estilos, como ‘Ente mazanos’, de Rafa Lorenzo, y ‘La pena abierta’, de Silvia Quesada. La gala de la Llaboral, que va contar tamién cola actuación de Taranus como ganador del añu pasáu con ‘Ensin ti’, va principiar a les 20.30 hores y tien entrada llibre.

Otros premiaos

Nesta edición de los Premios AMAS resultó ganadora Silvia Fernández, d’Asturiana Mining Company y GPS, ente otros grupos, a la meyor voz, y la Banda de Gaitas Marino Tapiega, a la meyor formación d’esti instrumentu tradicional. El restu de gallardonaos foron: Sixto Santamaría, de MyStero (baxu); Javier Fernández, de Sound of Silence y Legacy of Brutality (batería); Alfredo Morán (guitarra); José Ramón Feito (teclaos); el percusionista Juanjo Díaz (otros instrumentos); Nacho García (lletres); Alberto Rionda (producción); Desakato (direuto); Jgel Ordiz, por ‘Un nuevo anochecer’ de Sound of Silence (videoclip); ‘La dama oscura’, de ‘Alquimia’ d’Alberto Rionda (cantar rock); ‘Delirium’, de ‘La furia del fin’ de Fantástico Mundo de Mierda (cantar otres escenes); ‘Umbilical’, de Losone (discu otres escenes); Alexandra in Grey (grupu revelación); Nacho Vegas, por ‘Subir al cielo’ de Lucía Herrera (músiques pa cine); Richi Risco (DJ); y Las Casi Casitione (electrónica).

Otra manera, yá ta abiertu’l plazu pa presentar trabayos pa la segunda edición del FestiAMAS, certame que busca promocionar y premiar a los grupos asturianos pol so direuto. Los interesaos n’asoceder a los corveranos Ofensivos tienen hasta’l 20 d’abril pa unviar un mp3, una semeya en resolución alta y información sobre la formación a la direición amas@premiosamas.com. El ganador va recibir una contratación por un caché de 2.000 euros. 

Na semeya, la Banda Gaitas El Trasno.