Dixebra abre n’Uviéu la xira de presentación de ‘Tiempos modernos’

La uviedina sala Whippoorwhill ye’l llugar escoyíu por Dixebra p’abrir esti sábadu la xira de presentación del discu ‘Tiempos modernos’. Otres cites de la fin de selmana son les actuaciones d’Harpe Diem n’Avilés y de Taranus en Villaviciosa.

Los ocho miembros de la banda referente del rock n’asturianu van defender onde meyor se mueven, sobre l’escenariu, los temes del so trabayu nuevu, ‘Tiempos modernos’, el decimosegundu nos 27 años de vida del grupu. Ésti toma’l nome de la película de Charles Chaplin ‘Modern times’ (1936): “aquellos tiempos modernos que yá avanzare Chaplin nos años trenta del sieglu pasáu son güei la vida de tolos díes de miles de persones nesti capitalismu xabaz. Paru, perda de derechos, represión, corrupción, políticos ensin escrúpulos, alienación..., son claves pa entender l’actualidá y too ello ta presente nes lletres d’esta obra musical, pero tamién la esperanza, la resistencia, la solidaridá o l’activismu tienen espaciu nella”. En definitiva, un trabayu mui comprometíu que “ye una especie de crónica de lo que ta pasando, onde’l pasáu y el presente s’entemecen; ehí tán les referencies a la Fuelgona del 62, a Mayu del 68, a la creación d’Ensidesa, a la represión franquista, pero tamién al 15-M, a les movilizaciones mineres, a la represión policial actual...”, esplicó Xune Elipe, cantante de Dixebra, recién nuna entrevista nesti diariu dixital.

‘Tiempos modernos’ trátase d’ún de los discos más ellaboraos de los avilesinos, con quince cantares que desprende fuercia y enerxía. Mañana n’Uviéu van poder sentise la mayor parte d’ellos con ‘samples’ entemecíos pa la ocasión, pero tamién los clásicos de la banda, que nun pueden faltar nos conciertos de Dixebra. Completa la folixa programada na Whippoorwhill la presencia a los platos, enantes y depués de l’actuación, de Dani Anti$tailo col set 'L’arradiu Pikiñina / Fuck Da System Sound'. L’apertura de puertes va facese a les 23 hores y el preciu de la entrada ye de 12 euros, 10 si se merca de forma anticipada. Los puntos de venta son: L'Esperteyu y El Último Mono (Uviéu), Trisquel (Xixón), El Cafetón (Avilés) y L'Abellugu (Mieres).

Tres la cita d’Uviéu, Dixebra va treslladase a Madrid, onde tien una actuación programada’l vienres próximu na sala Lemon Music Live. Una bona ocasión pa que les munches ‘lleendes urbanes’ afincaes na capital castellana pueda disfrutar de los temes de la banda. Los madrilanos Blokeo van acompañar a los asturianos nesti conciertu previstu pa les 21 hores, con entraes a un preciu de 12 euros (más gastos) en venta anticipada y de 15, na puerta. Los tickets yá tán disponible n’Escridiscos, Potencial HC y Internet a traviés de Ticketea.

Conciertos n’El Cafetón y nel Riera

Una bona opción p’abrir esta fin de selmana cargada de conciertos ye acudir esta nueche al avilesín El Cafetón pa presenciar l’actuación del dúu asturianu Harpe Diem, formáu por Pedro P. Sanjurjo (xiblates y gaita rabil) y Dani García de la Cuesta (arpa céltica y vigulín). Estos dos músicos van xubir al escenariu a les 23 hores pa ufrir un repertoriu que tien como fontes melodíes tradicionales de los países del ámbitu célticu, asina como medievales y de composición propia.

Mientres, el sábadu, Taranus va zarrar la xira ‘Premiu al Meyor Cantar’ nel maliayu Teatru Riera (20 hores) con un conciertu especial nel que la banda va contar cola collaboración de collacios. Amás, va ayudase de proyeiciones, ente les que destaca la del videoclip del cantar ‘Ensin ti’, tema col que ganaron la edición del 2013 del ‘Premiu al Meyor Cantar’. P’asistir al Riera ye necesaria la retirada d’invitación, que se pue solicitar na cuenta de Taranus na rede social Facebook.