La XDLA presentó un requerimientu énte Presidencia pa que cumpla la llegalidá en materia toponímica

L’incumplimientu sistemáticu de la toponimia oficial por parte del Gobiernu llevó a la XDLA a presentar un requerimientu énte Presidencia pa que cumpla la llegalidá. Pon d’exemplu más de cien casos atopaos nel BOPA o na web institucional nel 2014.

Según espón na denuncia’l coleutivu cívicu, “en cuasi tola documentación xenerao dende les conseyeríes del Principáu d’Asturies nun s’utiliza’l nome oficial na so forma tradicional, inclumpliéndose polo tanto la llexislación y vulnerándose’l principiu de llegalidá consagráu nos artículos 9 y 103 de la Constitución Española del 1978, ún de los principios fundamentales d’un Estáu de Derechu”. La Xunta pola Defensa de la Llingua Asturiana (XDLA) entiende que, pola escasez de recursos, pueda llevar tiempu’l cambiu progresivu de cartelos o l’actualización de mapes, pero non que nun haya un usu normal de los topónimos nos escritos que l’Alministración produz a diario, lo que ye “un claru incumplimientu d’una Llei dictada pola mesma Alministración”. Por esti motivu, esixe “l’adopción de les midies necesaries pa correxir esta situación”.

Nel requerimientu amiéstense como muestra sesenta resoluciones o anuncios publicaos nel BOPA no que va d’añu qu’incumplen la llegalidá toponímica y unos exemplos de seiciones de la web del Gobiernu onde s’usen topónimos que tiene una forma yá oficializada dende va años pero que nun se respeten. Tres dar esti pasu, la XDLA valora la posibilidá de “impugnar de manera individualizada cualquier tipu de procedimientu alministrativu procedente de cualquiera de los organismos del Principáu d’Asturies qu’incumplan les formes toponímiques oficiales aprobaes pol mesmu Principáu”,

La esposición ’25 años de Conciertu en Cartelos’, en Ḷḷena

Tres pasar per Uviéu, Candás o Xixón, la esposición que muestra los cartelos de les 25 ediciones del Conciertu pola Oficialidá qu’entama la XDLA aporta a La Pola Ḷḷena. La muestra pue visitase mientres tol mes de febreru na sala Celso Granda de la Casa Cultura del Conciyu Ḷḷena de 19 a 21 hores. Según espliquen, “trátase d’un repasu a los cuasi 70 grupos que pasaron per estes 25 ediciones d’esti conciertu, y que quier valir d'homenaxe al llabor comprometíu de tola xente de la música que participen nos conciertos y tamién de denuncia y reivindicación de los drechos llingüísticos de tolos y toles asturianes”.