Una nevera y dellos televisores, primeros dispositivos 'intelixentes' que participen nun ciberataque

La compañía de seguridá estauxunidense Proofpoint detectó a primeros d’añu lo que considera’l primer ciberataque nel que s’utilicen dispositivos non convencionales. Ente los aparatos usaos destaquen una nevera y dellos televisores intelixentes.

Del 23 d’avientu al 6 de xineru 100.000 aparatos con conexón a Internet formaron parte d’una rede qu’unvió 750.000 correos electrónicos basura o 'spam'. La sorpresa pal téunicu de Proofpoint que descubrió esta aición foi que los dispositivos utilizaos nun yeren namái ordenadores personales (PC), sinón tamién televisores intelixentes, routers, centros multimedia y inclusive una nevera. Ello amuesa qu’esti tipu de dispositivos ‘intelixentes’, cada vegada más habituales nes nueses vides, nun cuenten con una proteición adecuada y que los consumidores nun tienen forma de combatir les infeiciones.

Los espertos coinciden en qu’estos ataques van medrar motivaos pol aumentu importante de dispositivos que s’espera nos años próximos. Los 'hackers' atopen nel ‘Internet de les coses’ una vía fácil pa entamar les sos aiciones malicioses.