SUATEA demanda'l cumplimientu de les resoluciones del Conseyu Escolar del Principáu relatives al asturianu

El Conseyu Escolar del Principáu d’Asturies aprobó por unanimidá na so sesión ordinaria última cuatro resoluciones relatives a la llingua asturiana. SUATEA demanda a l’Alministración asturiana’l cumplimientu de les mesmes. 

Según esplica’l sindicatu educativu, les cuatro resoluciones resúmensen en “la inclusión de l’asignatura ‘Llingua y Lliteratura Asturiana’ dientro del currículu de les enseñances non universitaries en toles sos etapes, asegurando la non discriminación de los alumnos que la escueyan; el reconocimientu esplícitu, dientro del Decretu d’Especialidaes del profesoráu d’Educación Primaria y Secundaria, de la especialidá de Llingua Asturiana, de forma que puean convocase concursu-oposición y de tresllaos por tala especialidá; que l’Alministración Educativa garantice la ufierta de l’asignatura Llingua Asturiana y Lliteratura en tolos centros d’Asturies (públicos y privaos), con calter voluntariu pal alumnáu y siendo la Conseyería d’Educación la encargada de velar pol cumplimientu estrictu d’esta norma; y aprovechar les ventayes curriculares del enseñu del asturianu (incluyendo la so contribución al dominiu de les Competencies Básiques), de forma que’l so deprendimientu seya posible pa la xeneralidá del alumnáu que cursa enseñances non universitaries nel sistema educativu asturianu”. Cuatro puntos que significaríen el “cumplimientu de la llexislación vixente, marcada pola Llei d’Usu de 1998, y polo tanto ye obligación de l’Alministración desendolcales”.

“La murnia realidá ye que dende l’aprobación de la llei les estorbises puestes polos diferentes gobiernos pa la so aplicación faen posible que quince años depués instituciones como’l Conseyu Escolar del Principáu tengan que recorda-y a  la Conseyería d’Educación cuála ye –tovía- la xera pendiente”, continúen dende’l Sindicatu Unitariu y Autónomu de Trabayadores de la Enseñanza d’Asturies (SUATEA), dalgo que consideren “inaceptable”. Por ello, demanda que la situación nueva que se da cola entrada de la Llei Orgánica pa la Meyora de la Calidá Educativa (LOMCE), la nomada ‘Llei Wert’, qu’obliga al Gobiernu asturianu a rediseñar el currículude toles etapes educatives, lleve a Educación a asumir “la so responsabilidá, de la que se vien safando cuantayá, pa encarar la dignificación de la Llingua Asturiana y del Gallego-Asturiano nel sistema educativu. Les resoluciones aprobaes pol Conseyu Escolar del Principáu son un toque d’atención  nesa dirección que l’Alministración fadría bien en respetar y cumplir”.

Muérganu consultivu máximu

El Conseyu Escolar del Principáu d’Asturies ye’l muérganu consultivo y de participación social máximu na programación xeneral d’enseñanza non universitaria del país, y ta integráu por profesores, padres y madres, alumnos y miembros de delles alministraciones autonómiques. Ente les sos funciones tán "reflexonar, estudiar y debatir los Proyeutos de Llei de Reglamentos qu’afeuten a la educación non universitaria; ellaborar dictámentes previos a les normes qu’en materia educativa se propongan aprobar la Xunta Xeneral y el Conseyu de Gobiernu del Principáu d’Asturies; y facer informes añales sobre la situación de la enseñanza non universitaria n’Asturies”.