LA XDLA asegura que la TPA aporta 100.000 euros a la FORTA en gastos de doblaxe al castellanu

Cerca de 100.000 euros pa la torna de productos audiovisuales al castellanu en Madrid. Ési ye’l gastu que fai la TPA nesti campu según la XDLA, que demanda la inversión d’eses perres a la creación d’una industria de doblaxe n’Asturies.

La Federación d’Organismos de Radio y Televisión Autonómicos (FORTA) encárgase de xestionar los doblaxes al castellanu de productos audiovisuales n’otres llingües que llueu les entidaes asociaes pueden emitir nos sos territorios, polo que ye’l coleutivu que recibe los casi 100.000 euros de la TPA qu’apunta la Xunta pola Defensa de la Llingua Asturiana (XDLA). La organización cívica cree qu’eses perres, nel casu de que l’ente públicu de comunicación emitiera en llingua asturiana, sirviríen pa traducir al asturianu “unes 30 hores de ficción estranxera, dalgo que permitiría’l nacimientu d’una industria del doblaxe nel nuestru país”, colo qu’ello supón en materia llaboral y de normalización llingüística.

La emisión el vienres 27 d’avientu de ‘El rostru impenetrable (One-eyed Jacks)’, primer llargumetraxe n’asturianu que dio la TPA nos sos ocho años d’historia, tuvo una cuota de pantalla del 5,1 por cientu, cuatro décimes superior a la media de la canal nesi mes, establecida nun 4,7 por cientu. Estes cifres tuvieron repercusión nos medios de comunicación asturianos al ser ún de los programes más vistos d’esa xornada pese a que la promoción del programa redúxose a los dos díes previos y a que les carteleres de los diarios anunciaeren el filme como si la versión a emitir fora la castellana. El vienres, esto ye una selmana más tarde de la emisión de ‘El rostru impenetrable’, y nel mesmu horariu –con una diferencia de 30 minutos–, la película d’aición en castellanu ‘U.S. Marshals’, con un repartu formáu por Tommy Lee Jones y Wesley Snipes, algamó un share del 3,4 por cientu, por debaxo de la media del día de la TPA, que quedó nun probe 4,1 por cientu.

Por último, la XDLA llamenta la política de la direición del ente públicu de comunicación, dao que tien constancia de la negativa a la merca de programes n’asturianu presentaos por delles productores y l’apueste por espacios en castellanu que son copies d’otros emitiós en televisiones estatales “y que nun aporten nada al sector audiovisual asturianu”. “Namás podemos pensar en razones ideolóxiques pa esplicar por qué nun quieren facer un apueste pol idioma, cuando ta comprobao que xeneraría unos datos meyores d’audiencia y mayores beneficios económicos, amás de vertebrar el texíu audiovisual del país. Siguir cola llinia de programación actual ye llevar a la cadena pel camín lentu de la so desapaición, porque los datos d’audiencia muestren el desapegu de la sociedá asturiana cola mayor parte de la emisión de TPA”, aseguren dende’l coleutivu cívicu.

La esposición ’25 años de Conciertu en Cartelos’, en Xixón

Tres pasar per Uviéu o Candás, la esposición que muestra los cartelos de les 25 ediciones del Conciertu pola Oficialidá qu’entama la XDLA aporta a Xixón. La muestra pue visitase mientres tol mes de xineru nel Espaciu Astragal del Conseyu de la Mocedá de Xixón. Según espliquen, “trátase d’un repasu a los cuasi 70 grupos que pasaron per estes 25 ediciones d’esti conciertu, y que quier valir d'homenaxe al llabor comprometíu de tola xente de la música que participen nos conciertos y tamién de denuncia y reivindicación de los drechos llingüísticos de tolos y toles asturianes”.