Presentóse en Noreña’l númberu 9 de ‘N’Ast. Cartafueyos d’Ensayu’

El salón d’aconceyamientos del Depósitu Vieyu d’Agua de Noreña acoyó’l vienres la presentación del númberu 9 de ‘N’Ast. Cartafueyos d’Ensayu’. Nesta edición recuéyense cuatro artículos interesantes que traten temes diversos.

Asina, nes 118 páxines d’esta espublización atópense los trabayos ‘Remanar la hestoria d’Asturies’, de Xuan Porta; ‘Totalitarismu (os): notes sobre les sos carauterístiques cimeres y la so aplicación al facismu español’, de Natalia Fernández; ‘La llucha de clases na Corona de Castiella’, d’Eduardo Abad y Sergio Alonso; y ‘El republicanismu federal na Asturies decimonónica’, de Javier Cubero. La revista ta a la venta al preciu de 10 euros y va tar disponible dende’l día 15 nes llibreríes uviedines Cervantes y Ojanguren, y na xixonesa Paradiso. Tamién se pue pidir al traviés del corréu electrónicu de l’Asociación Cultural N’Ast, promotora de la revista:  nast.oficialida@gmail.com.

La presentación del númberu 9 de ‘N’Ast. Cartafueyos d’Ensayu’ corrió a cargu del so direutor, Daniel Cueli, y de Toño Martínez, presidente de l’Asociación Cultural InfoNoreña, coleutivu qu’entamó esta cita, na que tamién se faló de la trayeutoria de la espublización, xunto con N’Ast. Ente los asistentes destacó la presencia de Lola Suárez, presidenta de N’Ast; Marcos Abel Fernández, xerente d’Espublizastur, empresa editora de la revista; Dulce Xil, ex xerente de la Llibrería Paraxuga; Pablo Pérez, conceyal de Conceyu Abiertu por Noreña, y Arturu Xosé Bermeyu, secretariu xeneral d’Andecha Astur.

Na semeya, Martínez y Cueli nun momentu del actu.