Ixuxú Asturies-Euskal Herria elkartea entama un mercadín ambulante de música del país

Aprovechando la recta final de les fiestes navidiegues, Ixuxú Asturies-Euskal Herria elkartea entama un ‘Mercadín de Música Asturiana’ que va percorrer delles poblaciones del país. Esti coleutivu ta en plena campaña de captación de socios.

L’oxetivu d’esta iniciativa nueva d’Ixuxú ye “fomentar el consumu de música asturiana y sumar sofitos pa l’asociación”, que trabaya p’averar la cultura asturiana, munches vegaes desconocida y estereotipada, en territoriu vascu. Dende ayeri, cuando tuvo presente en L’Entregu, y hasta’l domingu, esti mercáu ambulante va tar presente en delles poblaciones asturianes. Asina, esta tarde va instalase, de 19 a 22.30 hores, n’Avilés, en concreto n’El Cafetón. Mañana, los aficionaos del Ciares van poder acceder a los 50 discos del puestín d’Ixuxú nel campu de La Cruz  mientres el partíu de la xornada 20 qu’enfrenta a los xixoneses col Urraca (15.45 hores). Yá de tarde, de 19 a 22 hores, la parada próxima va ser el Judá, en La Pola Siero. Nel día previu a Reis, el domingu, el llugar onde poder mercar los discos del catálogu de l’asociación astur-vasca va ser La Manzorga, en Xixón, de 17.30 a 21 hores.

Otra manera, nel puestín tamién va ser posibles formalizar la inscripción de sociu pa financiar l’actividá d’Ixuxú Asturies-Euskal Herria elkartea, coleutivu que nel 2013 entamó una cantidá importante de conciertos y charres de temática asturiana en territoriu vascu. “Por una cuota de 1, 5 ó 10 euros mensuales –depende de si ye persona individual o un axente cultural–, se pue formar parte de l’asociación y tener amás otres ventaxes como descuentos nel catálogu, regalu de discos de música y usar tolos servicios qu’ufierta’l proyectu pa grupos de música y otros axentes culturales”, espliquen.