‘El rostru impenetrable’ tuvo una cuota de pantalla del 5,1 por cientu

La emisión en llingua asturiana de ‘El rostru impenetrable (One-eyed Jacks)’ contó con una cuota de pantalla del 5,1 por cientu, según informa la XDLA. El primer llargumetraxe dobláu al asturianu de la TPA superó la media de la canal.

El filme dirixíu por Marlon Brando foi un de los espacios más vistos del día pese a la competencia dura de la programación de les televisiones d’ámbitu estatal, con programes como ‘Sálvame Deluxe’ (16,6 por cientu de share a nivel estatal) o ‘Hermano mayor’ (8,1 por cientu). Asina, rexistró un 5,1 por cientu, cuando la media de la TPA nel mes de payares foi del 4,8 por cientu y la del vienres, día d’emisión, del 4,9 por cientu. Unos datos esperanzadores teniendo en cuenta que la fecha nun yera la más afayadiza y que les páxines de televisión nos diarios asturianos anunciaren el filme como si la versión a emitir fora la castellana.

La Xunta pola Defensa de la Llingua Asturiana (XDLA) destaca tamién la nomada ‘audiencia social’, esto ye, los datos qu’analicen cómo l’audiencia interautúa col programa al traviés de les redes sociales. Nesti aspeutu, el ‘hastag’ #ElRostruImpenetrable foi ún de los más utilizaos en Twitter na nueche del vienres, “xenerando más d’un 80% de comentarios positivos”, y en dellos foros d’Internet foi ún de los asuntos más comentaos, al igual que na cai. Ello lleva a la organización cívica a reclamar “que la emisión d’esta película nun quede nun casu aisláu y sía’l puntu d’arrinque pal nacimientu d’una industria del doblaxe n’Asturies, coles consecuencies positives qu’esto tendría pal empléu nel sector audivisual”.

D’igual forma, dende esti coleutivu recuerden la importancia de contar con una programación infantil en llingua asturiana, siendo la TPA, xunto con Aragón TV, la única canal europea d’un territoriu billingüe que nun emite nin un sólo segundu d’espacios pa neños y neñes nel idioma propiu. Tres la esperiencia del doblaxe fechu por Gonzali Producciones de ‘El rostru impenetrable’, la XDLA considera que dibuxos animaos n’asturianu podríen tener unes audiencies altes, como asocede n’otres autonómiques, ameyorando les cifres d’una televisión que caltién n’horariu infantil programes como ‘El faro’, con una cuota de pantalla del 0,2 por cientu.

Na semeya, Karl Malden, nel papel de Dad Longworth, y Brando, como Rio.