Andecha Astur acudió a Donostia a un conceyu con formaciones nacionalistes de cara a les Europées

El 25 de mayu van celebrase les eleiciones al Parllamentu Européu y los partíos nacionalistes yá principien a mover fiches pa facer frente común. Andecha Astur tuvo presente’l sábadu en Donostia nun conceyu con otres formaciones soberanistes.

Euskal Herria Bildu convocó a delles organizaciones nacionalistes del Estáu pa intercambiar “puntos de vista sobro los principales retos que se dibuxen nel horizón de les elleiciones europees” y aldericar la posibilidá de poner en marcha una “allianza amplia con formaciones soberanistes d’izquierda” pa los comicios. Asina, amás d’Andecha Astur, que tuvo representada pol so secretariu xeneral, Arturu Xosé Bermeyu, acudieron a Donostia Izquierda Castellana (Castilla), Puyalón de Cuchas (Aragón) y el Frente Popular Galega (Galicia), ente otros coleutivos, cola ausencia, pola distancia, de plataformes polítiques y sociales d’otros territorios como Canarias o Andalucía interesaos en participar na coalición. Otra manera, Euskal Herria Bildu caltuvo reuniones mientres la selmana en Catalunya, de manera separtada, con ERC, CUP y Solidaritat Catalana per la Independència, y enantes cola Chunta Aragonesista, Anova y BNG, nun ciclu d’aconceyamientos pa decidir cuála ye l’allianza más acertada.

Según anuncien dende Andecha Astur, la xornada “sirvió pa poner en común la situación de les estremaes lluches que tienen llugar nos distintos territorios, con particular atención a les dinámiques abiertes escontra les polítiques d’austeridá y recorte xeneralizáu de derechos sociales a cargu del gobiernu del PP y a los dictaos de la Troika”. Amás, toles formaciones coincidieren na necesidá de “esplorar les posibilidaes d’enanchar espacios favoratibles a la causa de les naciones primíes del Estáu, nun contestu de cris de réxime nel Estáu, y con particular atención a les lluches sociales qu’anguaño prenden con fuercia nos estremaos pueblos énte la xabazada de la cris y les polítiques anti sociales”. Dende la organización nacionalista anucien conceyos abiertos próximos cola militancia y simpatizantes “pa dir desendolcando conteníos y propuestes énte esta prósima convocatoria elleutoral europea, y pa dir tresnando les condiciones afayadices que permitan qu’esta plataforma d’izquierda soberanista tea una espresión acullá de les propies eleiciones”.

Semeya de la sede oficial del Parllamentu Européu, en Strasbourg, obra de Cédric Puisney. Imaxe baxo llicencia GFDL y CC-BY-SA-3.0.