El Día de les Ciencies Asturianes va averar la ciencia a los estudiantes dende la promoción de l'asturianu

El día 8 de payares va celebrase el IV Día de les Ciencies Asturianes, coles mires d'averar la ciencia a los estudiantes dende l'espardimientu y promoción de la llingua asturiana. Va tener llugar a les 11 hores nel Teatru de la Llaboral.

La Conseyería d’Educación, Cultura y Deporte, al traviés de la Dirección Xeneral de Política Llingüística, entama esti eventu al que s'espera qu'alleguen 1200 alumnos de Llingua asturiana y gallego-asturianu de 42 centros educativos del país. El doctor Carlos López-Otín de la Universidá d'Uviéu, destacáu investigador nel campu de la bioloxía, va protagonizar el programa d'actos cola conferencia “Les aventures moleculares de la vida”, y va caltener un coloquiu colos asistentes. Amás, la Conseyería baxo la dirección del propiu Lopez-Otín preparó un material didáctico en llingua asturiana na web de Educastur, incluyendo una versión en gallego-asturianu.

Esti actu celébrase con motivu del Día de la Ciencia de la Paz y el Desenvolvimientu, auspiciado pola UNESCO, y que quier concenciar a la población sobre la importancia de la ciencia y el so usu responsable en beneficiu de la sociedá.