El fracasu de ‘El Faro’ lleva a la XDLA a reclamar producciones que reflexen la identidá cultural del país

Un 1,3 por cientu de share, la cuota más baxa de toles televisiones autonómiques. Ésta ye la cifra probe que rexistró la serie ‘El Faro’ na so estrena na TPA, datu que lleva a la XDLA a reclamar producciones que reflexen la identidá cultural del país.

Mientres la media nel mes de setiembre de la TPA foi del 5,2 por cientu, la estrena de ‘El Faro’, serie de la que canal fixo una promoción amplia, quedó nun 1,3 por cientu de cuota de pantalla, mui lloñe d’otres producciones como ‘De folixa en folixa’ (11 por cientu’l 26 de setiembre), Sones (10,8 por cientu’l 8 de setiembre) o ‘Día de mercáu’ (8,3 por cientu’l 2 de setiembre), onde la cultura y la llingua asturiana son protagonistes. Hai delles selmanes, la Xunta pola Defensa de la Llingua Asturiana (XDLA) denunciaba de forma pública la participación del ente públicu de comunicación na producción de ‘El Faro’, “realizada mayormente con medios gallegos y que se rodó en más d’un 80 por cientu na llingua del país vecín”, por emitise en castellanu n’Asturies y por contar “con una ambientación que refuga les referencies a una idiosincrasia concreta, como dalgo que respondía a la política cultural de la FSA, caracterizada pol complexu d’inferioridá y el despreciu a lo propio”. “Agora, depués de la estrena de ‘El Faro’ pue vese cómo los asturianos dieron-y el llombu a esta producción”, afirmen dende la organización cívica dao l’audiencia probe que tuvo y que convierte “a TPA na cadena autonómica onde menos siguimientu tuvo la estrena". Asina, en TeleMadrid "tuvo una audiencia perriba de la media de la cadena, mentes qu’en TVG algamó unos datos más qu’aceptables". La otra cadena onde s'estrenó la serie'l llunes foi Canal Castilla-La Mancha.

Esti refugu por parte de los asturianos a la serie diaria que van emitir toles canales de FORTA, a esceición de l’autonómica murciana, y Canal Extremadura lleva a la XDLA a reclamar a TPA producciones que reflexen la identidá cultural del país y a recordar que namái’l 5 por cientu de los programes que s’emiten son en llingua asturiana. D’igual forma, esta organización fai referencia al ésitu n’otress autonómiques de series feches na llingua propia, como la vasca ‘Goenkale’, qu’acaba de cumplir 20 años n’emisión; la gallega ‘Padre Casares’, adaptada pola televisión andaluza, valenciana y balear, amás d’emitise doblada al castellanu en TeleMadrid y Castilla-La Mancha TV; la valenciana ‘L’Alqueria Blanca’, que ye líder d’audiencia na Comunitat Valenciana; o ‘La Riera’, telenovela de producción propia de TV3 qu’axunta cada tarde a 500.000 catalanes. “El so éxitu vien marcáu pola identificación del públicu na pantalla al traviés d’elementos qu’ayuden a reforzar la identidá cultural y llingüística, amás de responder a un propósitu doble: l’interés económicu de poner los pegollos d’un sector audiovisual, per un llau, y ameyorar la imaxe de la televisión como símbolu de madurez, per otru”, apunten dende la XDLA.

Creación d’un texíu audiovisual

La producción d’esti tipu de productos, “amás d’ayudar a xenerar datos bonos d’audiencia, repercutiría na economía del nuestru territoriu al ayudar a promover una industria audiovisual autóctona”, continúa’l comunicáu de la organización cívica, qu’añade que la TPA entovía “nun fixo un apueste poles series de producción propia, pola emisión d’obres de teatru o pol doblaxe al asturianu de ficción ayena, dalgo qu’ayudaría a xenerar puestos de trabayu y al nacimientu d’un texíu audiovisual nel país”. Asina, recuerda’l públicu ampliu qu’arrastren les pieces de teatru costumista per tol país, los más de 70.000 espectadores que rexistra hasta la fecha la obra ‘País’ d’Adolfo Camilo Díaz o los capítulos producíos pa Internet de la serie ‘Chatarrona’, con más de 20.000 visites na so primer selmana d’emisión, ensin escaecer la cuota de pantalla importante de los pocos programes en llingua asturiana de la TPA.