El XIV Seminariu d’Estudios Asturianos de la Fundación Belenos va tratar sobre la güelga celta nel país

La Fundación Belenos yá tien abierta la matrícula pal Seminariu d’Estudios Asturianos, que tien llugar en La Puela y qu’esti añu vive la so decimocuarta edición. El tema a tratar ye ‘La güelga celta n’Asturies: un averamientu interdisciplinar’.

Les feches escoyíes pa la celebración d’estes xornaes d’estudiu son los díes 19 y 20 d’esti mes, cola posibilidá d’agospiase con pensión completa nesta población del occidente del país, en concreto na Nueva Allandesa, sumando 60 euros a los 35 que cuesta la matrícula. L’actividá ta previsto que dea aniciu’l sábadu a les 10 hores col actu d’inauguración, al que va siguir la charra ‘La Edá de Fierro n’Asturies: paleoambiente esplotación del mediu y aspeutos culturales’, de Jesús Francisco Torres Martínez, doctor en Prehistoria y Arqueoloxía. Completen la mañana les ponencies ‘Una reflexón sol celtismu llingüísticu: el casu asturianu’ (12 hores), del caderalgu de Dialeutoloxía de la Universidá d’Uviéu, Xosé Lluis García Arias; y ‘Del Padre Carvallo a la Lliga Celta: historiografía del celtismu n’Asturies’ (13.15 hores), del psiquiatra y escritor Ignaciu Llope.

Tres la xinta prevista pa les 15 hores –primer comida incluyía pa les persones que s’agospien na Nueva Allandesa–, les conferencies van continuar a les 17.30 hores col etnógrafu Alberto Álvarez Peña, que va falar sobre ‘El mundu de les mentalidaes na Céltica atlántica: un ensayu de mitoloxía comparada’, al que va siguir el xeógrafu especialista n’Ordenación del Territorio Xosé Nel Riesgo con ‘Una propuesta pa la recuperación del llugar d’Asturies nel espaciu atlánticu européu’ (18.45 hores). La cena ta programada pa les 21.30 hores, pa zarrar la xornada con un filandón con música del país nel Café Centro (23.30 hores).

Conceyu abiertu nel castru de San Chuis

El domingu va ser el turnu del tradicional conceyu abiertu que se celebra nel Seminariu d’Estudios Asturianos. Nesta ocasión ta programáu pa les 11 hores y va tener llugar nel castru de San Chuis, en Samartín de Beduléu, con visita guiada pel llugar. A les 14.30 hores va principiar la xinta cabera –incluyía tamién na pensión compelta– y el piesllu d’estes xornaes d’estudiu.

Les persones que quieran formalizar la matrícula pa participar nesta actividá han de facer un ingresu de 35 euros na cuenta bancaria de la Fundación Belenos en Caxa Rural d’Asturies: 3059-0086-09-2348652823. Nel casu de qu’escueyan tamién la opción d’agospiu con pensión completa, han de sumar 60 euros a la cantidá inicial. Pa más información sobre’l XIV Seminariu d’Estudios Asturianos pue contautase cola Fundación Belenos nos teléfonos 985.24.48.11 y 616.242.319, o nel corréu electrónicu seminariubelenos@gmail.com.