Un proyeutu musical internacional trata’l conflictu llingüísticu n’Asturies al traviés de ‘La danza’ de Dixebra

El cantar ‘La danza’ de Dixebra va ser ún de los 33 temes que componen el proyeutu musical internacional ‘33 RPM: voices of the revolution’, que va tar na rede a partir del llunes. El so oxetivu ye investigar y difundir la creatividá en sitios en conflictu.

Un-Convention (Reinu Xuníu), Nomadic Wax (Estaos Xuníos), Fora Do Eixo (Brasil) y Tiuna El Fuerte (Venezuela) son les cuatro organizaciones musicales independientes qu’entamen esti proyeutu col sofitu d’In Place of War, iniciativa académica de la University of Manchester que tien como fin la investigación de la creatividá en sitios de conflictu, yá sía esti armáu, de guerra, crisis humanitaria o llingüísticu. Asina, ‘33 RPM: voices of the revolution’ presenta 33 cantares que traten “dalgunos de los socesos políticos más relevantes qu’acontecen anguaño nel mundu”, como “el llevantamientu árabe actual, la guerra civil de Siria, la busca de la democracia n’África, la llucha contra la discriminación llingüística n’Asturies y les reformes de derechos de tierra na India”; temes na que los artistes “creen música que reflexa y destaca la realidá actual nos sos países, ciudaes, pueblos y aldees”, esplica la páxina web del proyeutu.

La participación de Dixebra en ‘33 RPM: voices of the revolution’ nació nuna visita a Asturies de Teresa Dean, una moza inglesa que tuvo presente nel Conciertu pola Oficialidá d’esti añu pol convite d’unos collacios, que-y esplicaron la situación llingüística que vive anguaño’l país. Collaboradora d’esti proyeutu, Dean treslladó a los responsables lo que vio y conoció n’Asturies y propunxo la posibilidá d’incorporar el nuesu conflictu llingüísticu en ‘33 RPM: voices of the revolution’ al traviés de Dixebra. “Consiguió’l nuesu teléfonu y púnxose en contautu con nós pa ver si queríemos participar nel proyeutu”, esplica Xune Elipe, cantante de la banda avilesina, que pronto firmó tola documentación nesaria pa ceder los derechos de ‘La danza’.

El resultáu final ye qu’Asturies ye ún de los 33 países en conflictu que formen parte d’esta iniciativa que se va presentar el sábadu en Manchester nun festival que va contar cola presencia del ex neñu soldáu sudanés Emmanuel Jal –tamién presente nel discu– xunto con España –al traviés del raperu madrilanu Mentenguerra, que fala de los problemes del barriu–, Kenia, Exiptu, Palestina, Somalia, Reinu Xuníu, Mozambique, Senegal, Afganistán, Mali, Colombia, Túnez, Irlanda del Norte, Nueva Zelanda, India, Zimbaue, Yemen, Estaos Xuníos, Namibia, Irán, Togo, Francia, Italia, Venezuela, Chile, Cuba, República Democrática del Congu, Emiratos Árabes Xuníos, Uganda, México y Siria, amás de Sudán. Esti trabayu discográficu va tar colgáu na rede’l llunes y la intención ye la de sacar un vinilu doble con tolos cantares.

Pa Dixebra la presencia de ‘La danza’ nesti trabayu supón “un pasu más na internacionalización del conflictu llingüísticu que se vive n’Asturies”, amás d’un fechu “significativu, yá que de tol Estáu escoyeron l’asturianu como exemplu del casu d’una sociedá occidental, democrática, onde nun se cumple’l marcu xurídicu no que respeuta al tema llingüísticu”. Sobre’l restu de temes que componen ‘33 RPM: voices of the revolution’, Elipe destaca la “calidá increíble” de tolos cantares, “con lletres mui cañeres” y muncha diversidá d’estilos.

El discu nuevu de Dixebra, pa payares

Al mesmu tiempu que ve la lluz ‘33 RPM: voices of the revolution’, Dixebra continúa trabayando no que va ser el so discu nuevu d’estudiu. Tres finar la grabación, queda pendiente facer la mezcla, que va llevar unos diez díes, según la previsión d’Elipe, que cuenta con tener na cai l’álbum pa payares. “Ta siendo un discu mui llaboriosu, onde va too al milímetru, con munches collaboraciones”, esplica’l vocalista, qu’anuncia la participación d’un raperu colombianu afincáu n’Asturies tres un pasu per Francia y d’una cantante cubana, amás de músicos del país como Vito Álvarez, Javier Tejedor o Lisardo Prieto, ente otros munchos. Otra manera, anuncia que pese a que cada tema ye independiente de los otros, el trabayu tien “un conceptu global”.