Iniciativa y XDLA demanden soluciones a Educación énte la falta de maestros d'asturianu en 14 centros

La situación que viven cientos d’escolinos énte la falta de maestros d’asturianu en 14 centros demanda una solución rápida, postura na que coinciden la XDLA y Iniciativa. Sólo nel cangués Maestru Casanova son 200 los alumnos ensin clase.

El Sindicatu Unitariu y Autónomu de Trabayadores de la Enseñanza d’Asturies (SUATEA) denunció’l 20 de setiembre que doce centros de Primeria nun contaben, pese al aniciu del cursu, con maestru de Llingua Asturiana y, otros dos, de Gallego-asturiano, y esixía l’apertura de les bolses d’aspirantes a interinidá. La Conseyería d’Educación, Cultura y Deporte nun resolvió entovía esta situación, lo que lleva a Iniciativa pol Asturianu y a la Xunta pola Defensa de la Llingua Asturiana (XDLA) a asoleyar sendo comunicaos demandando una solución a esti problema que dexa ensin clase a cientos de escolinos y escolines.

Iniciativa pol Asturianu yá demandó hai meses “un nuevu procesu de formación de llista de maestros d'asturianu y gallego-asturianu cola fin de tener en setiembre'l númberu de docentes necesarios pa cubrir toles places ufiertaes de dicha asignatura”, al tener en cuenta “l'ausencia de convocatoria d'oposiciones al cuerpu de maestros y l'importante númberu de xubilaciones”. Daquella, el coleutivu que trabaya na normalización de la llingua del país vía posible una situación como la que se ta dando anguaño, con “un aumentu considerable de los interinos a axudicar poles diferentes especialidaes”, lo que dexa a la llista d’asturianu “agotada ensin posibilidá d'axudicar vacantes”. Por too ello, reclama a Educación la “inminente apertura d'una bolsa d'asturianu pa poder cubrir les vacantes que falten, asina como una actualización de les llistes, tanto d'asturianu como de gallego-asturianu, pa evitar tolos problemes que xurden tolos años al entamu del cursu escolar”, y recuerden la promesa de la conseyera Ana González de crear nesta llexislatura la especialidá de la materia, “equiparando asina al profesoráu d'asturianu colos demás especialistes”.

Indignación en Cangas

La XDLA tamién esixe a González “la solución d'estos problemes de manera inmediata” y  la creación de la especialidá, aición más “eficaz” que diba a ayudar “a remediar la provisionalidá y precariedá de l'asignatura y del profesoráu”, al mesmu tiempu que fai pública la situación del Colexu Públicu Maestru Casanova, de Cangas del Narcea. Nesti centru hai “200 neños y neñes” ensin clase de Llingua Asturiana, “lo que ta provocando la indignación, bien comprensible, ente les families que, con tol material y llibros compraos, tienen que ver cómo la Conseyería d'Educación nun fixo nada pa prever esta situación”. Un exemplu de lo que tamién acontece n’otros trece centros del país.