El ciclu de cine ‘Baxando pa la galería’, novedá principal de les xornaes ‘De Castilletes y Carbón’

Les IV Xornaes Culturales ‘De Castilletes y Carbón’ van principiar esti miércoles col entamu d’un ciclu de cine de nome ‘Baxando pa la galería’. El conciertu de Nuberu d’esti añu pa Santa Bárbola va tener como sede La Pola Llaviana.

En total van ser cinco les películes que van proyeutase los miércoles d’ochobre nel Cine Felgueroso de Sama nesta actividá novedosa dientro de les IV Xornaes Culturales ‘De Castilletes y Carbón’, qu’entamen la Fundación Nuberu y el Conceyu de Llangréu, adelantando asina un mes esta iniciativa que se desendolcaba namái en payares. El filme británicu ‘Tocando el viento (Brassed Off)’, dirixíu nel 1997 por Mark Herman, va abrir mañana’l ciclu ‘Baxando pa la galería’. Trátase de la historia d’una mina de carbón asitiada nun pueblu del norte d’Inglaterra que ta a piques de zarrar mientres el Gobiernu de Margaret Thatcher y, con ella, la banda de música de los mineros, toda una institución d’un sieglu d’historia. Ún de los trabayadores va tratar de qu’eso nun se produza.

Les otres películas que completen esti ciclu son ‘La sal de la tierra’ (día 9), ‘Las aguas bajan negras’ (día 16), ‘Subterra’ (día 23) y ‘En tierra de hombres (North Country)’ (día 30). Toles proyeiciones van principiar a les 20 hores.

‘Los xueves de Castillete y Carbón’, en payares

El formatu de charres que se celebró n’años anteriores en payares va continuar nesta edición d’unes xornaes que xiren alredor de les interrellaciones ente cine, mina, música, lliteratura, economía y gastronomía, ente otres disciplines. Tamién va repetir el Centru de Referencia de la Cultura y la Llingua Asturiana Casa de los Alberti como sede de les conferencies, que va abrir el 7 de payares Luis Felipe Capellín con ‘Tiempu de fugaos’. ‘Reflexones alredor del municipalismu’ ye la temática escoyida por Adrián Barbón pa la so intervención del día 14, mientres que la ‘Enseñanza n’asturianu’ va protagonizar la sesión del día 21, ponencia que va impartir Xosé Antón González Riaño. Un recital lliterariu, de nome ‘Compañeru, dame tira’, cola participación de Chechu García y Pablo Rodríguez Medina, va zarrar esta actividá. Les 20 hores ya la hora prevista d’entamu de toles charres.

Como yá ye vezu, el ramu a les xornaes culturales va ser un conciertu de Nuberu pa Santa Bárbola, 4 d’avientu, qu’esti añu cai en miércoles. Tres tener como sede La Felguera y L’Entregu, y calteniendo la idea de mover esta actuación per tol valle del Nalón, Chus Pedro y Manolo Peñayos van xuntase otra vuelta nun escenariu en La Pola Llaviana.