La Vagamar 2013 va principiar con un homenaxe a Seamus Heaney

La memoria del escritor Seamus Heaney, fináu’l pasáu 30 d’agostu, va protagonizar la primer actividá de la Vagamar 2013, actividá setembrina de L’Arribada. El Centru Cultura Antiguu Institutu de Xixón va acoyer un actu d’homenaxe al irlandés.

L’Asociación Cultural L’Arribada, que ta trabayando anguaño en zarrar la programación de la Vagamar 2013, dio un adelantu de les actividaes previstes na edición d’esti añu, que va allargase a ochobre y payares. Asina, el vienres próximu, a les 19.30 hores, el patiu del centru municipal va acoyer un homenaxe al Premiu Nobel de Lliteratura del 1995, mui venceyáu a Asturies y defensor de la oficialidá del idioma del país, que va consistir nuna llectura cívica y en dos actuaciones musicales. Asina, Mento Hevia va dar un conciertu de raviola astúrica y la Coral Asturiana de Gijón va interpretar dellos cantares.

Mientres, el sábadu 28, a les 18.30 hores, va tener llugar nel salón d’actos del Antiguu Institutu la inauguración institucional de la Vagamar 2013, a la que va siguir, yá nel patiu, l’actu d’entrega de los Premios Timón. Los ganadores nesta ocasión son Miguel Rojo (VII Premiu Timón p’autores en llingua asturiana y eonaviego), Gonzalo Suárez (IV Premio Timón pa escritores asturianos en castellanu) y l’Asociación Cultural Ensame Sidreru, qu’algama la primer edición del Premiu Timón de Cultura Asturiana, dirixíu a asociaciones, sociedaes y fundaciones con sede n'Asturies que tengan como fin la conservación y promoción de la identidá cultural del país y qu'empleguen la llingua asturiana nes sos actividaes. La Coral Polifónica Anselmo Solar va actuar tres la entrega de gallardones y Carlos Alba ‘Cellero’ va zarrar la xornada cola representación de ‘Llázaro de Tormes’.