La Escuela de Música Tradicional La Quintana inauguró’l cursu

Esti martes principiaron les clases del cursu 2013-2014 na Escuela de Música Tradicional La Quintana. Les persones interesaes en deprender dalgún instrumentu tradicional asturianu tovía pueden matriculase nesti centru xixonés.

Pa esti cursu La Quintana ufre la posibilidá de dar clases de gaita, xiblata travesera, curdión diatónicu, percusión, curdión de tecla, zanfona, guitarra, vigulín y asturianada, arriendes del necesariu solféu. Como profesores, los alumnos y alumnes van tener xente bien conocío nel ámbitu de la música asturiana, como Borja Baragaño (gaita y xiblata travesera), Pedro Pérez (gaita), David Varela (curdión diatónicu), Juanjo Díaz (percusión), Marga Lorences (curdión de tecla), Merce Santos (zanfona), Moises Suárez (guitarra), Lisardo Prieto (solféu y vigulín) y Ismael Tomas (asturianada).

La Escuela de Música Tradicional La Quintana nació nel añu 1998 cola idea d’ufiertar nun mesmu sitiu la posibilidá de deprender una bona riestra d'instrumentos tradicionales asturianos en clases individuales. Güei, quince años depués, esti centru decanu asitiáu nel Colexu Públicu Rei Pelayo, na avenía de la Constitución númberu 57, caltién la mesma filosofía. P’algamar información o tramitar la matrícula, los interesaos pueden pasar pola escuela o contautar al traviés de la web, el corréu electrónicu laquintana@laquintana.as, la páxina de Facebook o los teléfonos 649.788.293 o nel 687.830.702.