Ribeseya vive esti sábadu una Nueche Folk n’homenaxe a Puru

Siete formaciones van participar esti sábadu na Nueche Folk de Ribeseya n’Alcordanza de David Mateos ‘Puru’, miembru de Corquiéu que finó n’agostu del añu pasáu. La cita va ser el sábadu, a partir de les 19 hores, n’El Muelle.

Compañeros de la banda folk, collacios y clientes del Chigre Corquiéu, que rexentaba, entamen esti homenaxe musical a Puru. En total van ser más de siete hores de música gracies a la participación desinteresada –nesti orde– de la Banda Gaites Ribeseya, un grupu improvisáu formáu por Paul, Turi, Miguelín y Pablo, P’Amusquis, Seu, los cántabros Naheba y Felpeyu. Pa finar, Corquiéu va ufrir un conciertu especial nel que van tomar parte tolos músicos que pasaron pola formación dende la so creación, nel añu 1997.

Otra manera, la banda rioseyana, que nun tien previsto incorporar un percusionista que sustituya a Puru, presenta nesta cita a una cantante nueva, Lluci Palomares. Pese al golpe duru que supunxo la perda del so compañeru, Corquiéu tien en mente la grabación d’un cuartu discu a mediu plazu.

Conciertu de Taranus en Llanes y final de FestiAMAS n’Uviéu

La población vecina de Llanes tamién va tener un conciertu nel que l’idioma del país va ser protagonista. Esta tarde (20.30 hores), dientro de la xira pol ‘Premiu al Meyor Cantar’, Taranus va actuar nel Casinu-Teatru. La banda de folk-metal tienen tamién confirmaes actuaciones n’Avilés (27 de setiembre), La Felguera (5 d’ochobre) y Cangas del Narcea (12 d’ochobre).

Otra manera, Misiva y Seu aspiren a llevar el domingu el concursu FestiAMAS. La final va tener llugar na Plaza la Catedral, n’Uviéu, a les 21.30 hores y nella tamién van participar Ofensivos y Last Days of Eden.