El 54 por cientu de los usuarios d’Asturies.com, contrariu a l’actitú del Gobiernu británicu con Xibraltar

Los llectores que participaron nel nuesu ‘Conceyu Abiertu’ amosaron la so disconformidá sobre l’actitú del Gobiernu británicu con Xibraltar. Un 54 por cientu ve xustificada la reaición del Executivu énte’l conflictu y al 23 por cientu, nun-y interesa.

Con esti ‘Conceyu Abiertu’ pretendíemos conocer la opinión de los nuesos usuarios sobre’l conflictu abiertu ente l’Estáu Español y el Reinu Xuníu sobre Xibraltar dende que les autoridaes britániques decidiera llanzar más de mediu centenar de bloques de formigón a la mar, aición que, según apunten dende Madrid, perxudica a los pescadores andaluces. Un 54 por cientu de los llectores d’Asturies.com considera que la reaición ye xustificada, mentes qu’un 23 por cientu cree qu’ésta respuesta ye una manera d’esviar l’atención por parte del Executivu de Rajoy en plena crisis económica. Mentes, un 23 por cientu asegura que nun-y importa un res lo qu’asoceda col Peñón.

Dende esti momentu yá ye posible votar nun ‘Conceyu Abiertu’ nuevu. Nesta ocasión queremos conocer la opinión de los nuesos llectores sobre la polémica que vivió la sidra en Xixón tres la entrada de la Ordenanza de Convivencia Ciudadana y si ésta ha de tratase como ‘botellón’ o non.