Un congresu va reunir a xente mozo que se dedica a la creación cultural nel ámbitu asturianu

L’auditoriu d’Uviéu va acoyer, el 19 d’ochobre, el primer Congresu Cultura Asturiana Mozo. Nél va participar xente de menos de 35 años que se dedica a la creación cultural nel ámbitu asturianu pa visibilizar el so llabor énte la sociedá.

L’Asociación Cultural L’Arribada y la Fundación Nueva Asturies son les dos entidaes qu’impulsen esta iniciativa na que ta collaborando delles personalidaes de la cultura asturiana y qu’entá nun tien zarráu’l programa oficial. “Los oxetivos son, de manera interna, ver cómo ven les nueves xeneraciones la cultura asturiana, la so actividá, el mundu económicu y empresarial d’ellos, asina como les perspeutives de futuru que tienen”, apunta Xuan Xosé Sánchez Vicente, que darréu añade que, de manera esterna, la idea fundamental ye facer visible a los güeyos de la sociedá del país a miles de profesionales de la cultura asturiana de los que desconoz el so llabor. “Queremos treslladar a la sociedá asturiana qu’equí hai un mundu ricu na so variedá, creativu y coneutáu al mundu contemporaneu, quitando asina esa imaxe que caltién una parte de la sociedá de que’l mundu cultural asturianu ta mui arreyáu a lo antiguo, a lo folclórico”, continúa’l representante de la Fundación Nueva Asturies.

Entrugáu sobre l’orixe d’esta idea, Sánchez Vicente señala que nun ye nueva, sinón que se vien cocinando “dende hai cinco o seis años”. Al final, el sábadu 19 d’ochobre ye la fecha escoyida pa entamar esta iniciativa “abierta a tol mundu” que va ocupar l’auditoriu uviedín a lo llargo de tol día con delles ponencies. “El papel de L’Arribada y la Fundación Nueva Asturies ye puramente impulsor, asina como’l de la xente encargada de coordinar toles estayes”, esplica’l xixonés, qu’anuncia que yá ye posible formalizar la inscripción al congresu y proponer ponencies al traviés de la web.

De momento, les previstes nestos momentos, anque con posibilidá de dalguna incorporación o modificación, según apunta Humberto Gonzali, de L’Arribada, son ‘Cine y medios audiovisuales, productores de radio y televisión’, ‘Investigadores y revistes d’investigación’, ‘Teatru y el cómic’ (dos ponencies), ‘Lliteratura y creación lliteraria. Los nuevos creadores’, ‘Trabayadores na Alministración nel sector de la llingua y la cultura’, ‘Internet, prensa n’Internet’ (cuatro ponencies), ‘Mundu de la música folk y la tonada’ (dos ponencies), ‘Bandes de gaites y grupos de baille’ (dos ponencies), ‘Otres espresiones musicales n’asturianu. La música contemporánea’, ‘La radio n’asturianu’ (dos ponencies) y ‘Asociciones de defensa de la llingua y revistes’ (dos ponencies). Otra manera, la llista de persones encargaes de coordinar estes estayes, caún nel so ámbitu de trabayu, confórmenla nestos momentos Fernando de la Fuente Trabanco, direutor d’Asturies.com; David Guardado; Anabel Santiago; Inaciu Varillas; Sofía Castañón; María Xosé Rodríguez, Inaciu Galán, Bras Rodrigo Prieto, Aitor García, Illán Gonzali, Rafa Rodríguez Valdés y Lluis Antón González.

Na semeya, Sánchez Vicente y Gonzali mientres l'actu de presentación del congresu que tuvo llugar nel Centru Empresarial d'Uviéu.