Los recortes n’educación cébense con la enseñanza de la llingua asturiana

La Conseyería d’Educación y Cultura dio a conocer el pasáu 20 d’agostu la convocatoria d’interinidaes pal nuevu cursu. La XDLA denuncia que los recortes precarizan la enseñanza de l'asturianu y amás la Conseyería incumple la toponimia oficial.

La enseñanza de la llingua asturiana va vese especialmente afectada pola política xeneralizada de recortes del Gobiernu. Les xornaes completes del profesoraú menguarán nun 40% y de la mesma manera la reducción de les xornaes a la metá xube un 80%. Midíes que, xuntu col diseñu d’itinerancies mui dures ente localidaes que tan mui lloñe o d'accesu abegosu, precarizan les condiciones llaborales d’una enseñanza qu'enfréntase un cursu más a la marxinación.

La Xunta pola Defensa de la Llingua Asturiana denuncia tamién que la Conseyería insiste en facer referencia nos sos escritos, llistes y convocatories a unes formes toponímiques yá inesistentes y allegales. Asina pon en ridículu la esistencia d’una Dirección Xeneral de Política Llingüística y d’una Xunta de Toponimia, una y bones la entidá encargada de la recuperación d'esta toponimia ye la mesma qu’inora les formes correctes y oficiales.