La campaña arqueolóxica en Vigaña remata so la incertidume de la falta de financiamientu

L'equipu lideráu polos arqueólogos asturianos Margarita Fernández Mier y David González Álvarez topó en xunetu'l primer asentamientu neolíticu al campu afayáu n'Asturies. La falta de fondos pon en peligru la continuidá del proyectu.

La campaña, que remató tres mes y mediu de trabayu, desenvolvióse en cuatro localizaciones de la redolada de Vigaña, en Balmonte. Forma parte del proyectu d'investigación “La formación de los paisaxes del Noroeste peninsular mientres la Edá Media”, dirixíu pola doctora Margarita Fernández Mier, que trata de conocer la evolución del paisaxe de les árees montascoses del Cordal Cantábricu ente la Prehistoria y los nuesos díes. Un proyectu que lleven desendolcando dende 2010 y que refundió nueva lluz sobre la formación del paisaxe asturiano y la forma de vida de los sos antiguos pobladores. La so metodoloxía, denominada “arqueoloxía del paisaxe”, céntrase sobremanera nos espacios de trabayu, como campos de cultivu o terraces  agraries, amás de los espacios d'hábitat y les necrópolis.

Anguaño'l trabayu de campu concentróse nel pobláu fortificáu d'El Castru y l'ilesia parroquial de San Pedro de Vigaña, dos espacios yá investigaos pero nos que se realizaron nuevos descubrimientos. Nel ámbitu de la ilesia fueron identificaes más de 35 tumbes de distintes tipoloxíes que van ampliar la conocencia de la población llabradora qu'habitaba Vigaña a finales de la Edá Media. N'El Castru les escavaciones revelaron una área metalúrxica, dedicada al trabayu del cobre, que según les dataciones radiocarbónicas desenvolveríase fai unos 2.200 años. Frutu de les investigaciones, en Vigaña conócense les evidencies d'una ocupación casi ininterrumpida que toma unos 2.500 años ente la Edá del Fierro y l'actualidá, amás de les referencies de los grupos nómades del Neolíticu que poblaríen esti territoriu nun intervalu entendíu ente fai 6.000 y 5.000 años.

Sicasí, a pesar de les prometedores resultancies, los investigadores vense envueltos na incertidume derivada de los problemes de financiamientu y los retayos n'investigación, que ponen en peligru la continuidá d'estes escavaciones l'añu que vien. Una nueva campaña braniza en Vigaña ye a día de güei casi imposible por cuenta de los retrasos nes convocatories estatales pa proyectos d'investigación. L'equipu coordináu por Margarita Fernández Mier busca agora'l sofitu de les alministraciones local y rexonal, pa caltener vives unes investigaciones que pueden constituyir un recursu útil nestes zones, una y bones el Patrimoniu cultural ufierta oportunidaes de desenvolvimientu pa sectores como la educación o'l turismu.