Compromisu y Conceyu Abiertu sofiten de manera conxunta la manifestación antitaurina de Xixón

Esti vienres principia con una novillada la Feria de Begoña de Xixón y Anadel convoca una manifestación antitaurina pa esti domingu. Compromisu y Conceyu Abiertu sacaron un comunicáu conxuntu nel que sofiten esta protesta.

Xesús Nel García y Daniel Fernández, voceros de Conceyu Abiertu por Xixón y Compromisu por Xixón, de manera respeutiva, roblen esti testu nel qu’anuncien la participación conxunta de les dos organizaciones na manifestación convocada pol coleutivu animalista Anadel pal domingu a les 16.30 hores, con salida de la plazuela San Miguel y final frente a la plaza de toros d’El Bibio, onde esa mesma tarde va tener llugar la segunda corrida de la feria. Dende Conceyu Abiertu animen “a toes y tolos asturianos polo xeneral y a la ciudadanía de Xixón en particular” a participar na marcha “pa paralizar un eventu que se caracteriza por dos coses: ser una forma de maltratu y tortura animal inalmitible y por cuntar col refugu de la mayoría de les asturianes y asturianos”. Amás, García refuga l’actuación policial del añu pasáu que finó cola detención de dos persones por agresiones supuestes a axentes del orde, qu’al final demostráronse falses énte’l xuez, y solicita a los convocantes que “nun se dexen amedranar poles práctiques intimidatories de la Policía”.

Pela so parte, Fernández recuerda que la celebración d’eventos taurinos nun espaciu públicu ye “un incumplimientu evidente de la Ordenanza de Convivencia” aprobada recién y anuncia que les dos organizaciones van presentar una denuncia por esti fechu, asina como estudiar midíes llegales contra’l Conceyu de Xixón nel casu de que se niegue a aplicar les sanciones establecíes por maltratu animal na ordenanza. Por último, Compromisu por Xixón criticó “la insensatez de caltener una tradición de 125 años que va contra tola corriente de pensamientu de les y los asturianos más destacaos de la historia, empezando por Xovellanos y acabando pol rector de la Universidá d'Uviéu nel 1900, Aniceto Sela, y pasando polos partíos republicanos, inclusive'l PSOE a pesar de que los sofite anguaño”.

Xunto con Compromisu y Conceyu Abiertu, apoyen la convocatoria d’Anadel otres organizaciones como PACMA, AEVA, Trasgu Asociación Animales, Asociación Protectora La Llobera, Plataforma Ciudadana Pro Animales de Oviedo y Equo Asturies.