Once conceyos aprobaron mociones d’apoyu a la querella arxentina contra’l franquismu

Hasta la fecha son once los conceyos asturianos qu’aprobaron mociones d’apoyu a la querella arxentina contra’l franquismu. Un grupu de ciudadanos continúa trabayando al traviés d’una plataforma pa sumar apoyos a esta causa xudicial abierta.

Nel 2010, la xueza María Servini de Cubría abrió una investigación tres una denuncia de familiares de víctimes y solicitó al Estáu español información sobre los militares involucraos na dictadura y llistes d’asesinaos y desapaecíos, ente otros documentos. Dellos coleutivos recibieron con esperanza esta iniciativa de la xusticia arxentina al entender que, tres la Llei d’Amnistía del 1977, los crímenes franquistes quedaron impunes dafechu, creándose plataformes d’apoyu a la querella. N’Asturies, un grupu de ciudadanos entamó n’abril el Grupu Asturianu d'Apoyu a la Querella Arxentina que, nesti tiempu, fixo recoyíes de firmes y promovió l’aprobación de declaraciones institucionales en conceyos del país, col oxetivu de llevar tamién una moción de sofitu a la Xunta Xeneral.

De momento, son once los ayuntamientos asturianos que, en Plenu, aprobaron l’apoyu a esta causa abierta contra los crímenes del franquismu. La llista confórmenla Avilés, Mieres, Llangréu, Ayer, Castripol, Riosa, Noreña, Morcín, El Franco, Samartín del Rei Aurelio y Corvera, cola posibilidá de que nes selmanes próximes s’incorporen Ḷḷena, La Ribera, Llaviana, Grau, Bual y Carreño. “La plataforma d’Asturies ta centrando’l so trabayu en dar a conocer la iniciativa y posibilitar que les personas que sufrieron la represión y/o los familiares puedan utilizar esta vía pa esixir la verdá, xusticia y reparación”, señalen dende’l coleutivu, que’l 18 de xunetu pasáu presentó xunto con Amnistía Internacional l’informe ‘El tiempo pasa, la impunidad permanece’ d’Ignacio Jovits, espublizáu por esta organización, sobre les víctimes de la Guerra Civil y el franquismu.

Na imaxe, Francisco Franco posa xunto col nazi Heinrich Himmler, comandante en xefe de les SS, nun alcuentru celebráu nel 1940. Semeya procedente del Bundesarchiv, Bild 183-L15327 / CC-BY-SA