La Fiesta la Cultura torna a Los Maizales con un programa cargáu d'actividaes y de música asturiana

La carbayera Los Maizales, en Xixón, var ser sede 29 años depués d’una edición renovada de la Fiesta la Cultura. Xuegos tradicionales, tonada y actuaciones de Nuberu, Spanta la Xente o La Curuxa, son parte d’un programa perampliu.

Esta folixa creada pola izquierda baxo'l nome del 'Día de la Cultura' nel 1972, en plenu franquismu, como puntu d’alcuentru y espaciu pa reivindicar la cultura y les llibertaes, desendolcóse nesta carbayera asitiada nel barriu de Cefontes, en Cabueñes, hasta’l 1984. Nesi tiempu, miles de persones acudíen a esta cita qu’axuntó a los más conocíos cantautores de la época y qu’agora, 29 años después, nun momentu de recortes y crisis, recúperase gracies a la iniciativa de delles persones de la izquierda asturiana. Como yera vezu, la Fiesta la Cultura va tener llugar el segundu domingu d’agostu, en plena Selmana Grande de Xixón, polo que nesta edición va celebrase’l 11 d’agostu. P’atrayer a la xente otra vuelta a Los Maizales, la organización tien preparada un programa ampliu nel qu’hai sitiu pa charres, presentaciones de llibros, esposiciones, xuegos tradicionales, música, una muestra d’asturcones y actividaes pa críos, ente otros.

Nel terrén musical, a les 11 la mañana va haber güecu pa la tonada, cola participación de Misael (Lito Texuca), José Manuel Collado, El Che de Cabaños y Marisa Valle Roso. Yá pela tarde, a partir de les 16.30 hores, van actuar Artemio/Rodrigo Aperi, El Problema del Barrio, La Colmena, Proyecto Sol, Alfredo González, Rafa Lorenzo, Anabel Santiago, Orquesta Céltica Asturiana, Julio Ramos, Arma X, La Curuxa, Spanta la Xente, La Tarrancha y Nuberu. Tamién van xubir al escenariu d’esta fiesta de prau, qu’espera tener continuidá nos años vinientes, los vascos Salvador Amor y Gabriel Ortega.

El cartelu de la Fiesta la Cultura ye obra d'Alfonso Zapico.