La mina d’Arnáu reabre como muséu 98 años depués del so zarru

Esti martes celebróse la inauguración del Muséu de la Mina d’Arnáu, con sede na instalación que zarró les sos puertes nel añu 1915. Esta infraestructura situada xunto a la playa va permitir conocer el pasáu del primer pozu vertical del país.

Ana González, conseyera d’Educación, Cultura y Deporte, qu’ayeri nun se desplazó a Cangas del Narcea a la inauguración oficial de la Universidá Asturiana de Branu (UABRA) como fixera l’añu pasáu, acudió esta mañana a Castrillón pa conocer de primer mano el resultáu final d’unes obres que se centraron na recuperación del casinu, el castillete y parte de les galeríes de la mina como zones espositives y interpretatives. Los visitantes baxarán, nun descensu de 19 metros, hasta les galeríes nuna xaula, pa depués salir pola playa.

La mina d’Arnáu abrióse nel 1833 cola llegada de la Real Compañía Asturiana de Minas, anque la esplotación data del sieglu XVI. Trátabase de la primer mina submarina del Estáu y del primer pozu vertical del país. Dellos incendios y episodios de filtraciones d’agua de mar, a partir de 1903, complicaron la situación de la mina hasta llevar al zarru, nel añu 1915. Agora, 98 años depués, torna a abrir les sos puertes como muséu. La visita tien una duración estimada de 50 minutos y un preciu de cuatro euros, pa los adultos, y de 2,5 euros, pa neños y neñes, anque güei y mañana va vivir dos xornaes de puertes abiertes con motivu de la so inauguración.