Conceyu Abiertu y Compromisu refuguen el Festival Aereu de Xixón

Esti domingu va tener llugar en Xixón el VIII Festival Aéreo Ciudad de Gijón. Les formaciones Conceyu Abiertu y Compromisu coinciden en refugar esti certame impulsáu pol Conceyu pol so carauter “belicista” y pol so gastu importante.

Conceyu Abiertu por Xixón califica la exhibición aérea de “aición propagandística del exércitu español amazcaritada d’espectaculu pa tolos públicos” y considera que nestos tiempos que cuerren “nun nos paez afayadizo caltener festivales que necesiten d’una inversión municipal tan importante y que xenera tan pocos réditos”. Amás, los nacionalistes critiquen que nel cartelu d’esti añu “podemos ver aviones qu’inequívocamente pertenecen al exércitu golpista de Franco y a un bombarderu alemán, amosando nidiamente que nun tamos ante un espectáculu inocente, sinón ante una glorificación nidia a dos exércitos que bombardearon cruelmente a la población civil de la nuesa ciudá y el nuesu pais, amás de la de dellos paises europeos”.

Pela so parte, Daniel Fernández, voceru de Compromisu por Xixón, llamenta “l'aumentu del fomentu de los valores militar y castrense que se ta produciendo n’Asturies y en Xixón, independientemente del color del gobiernu de vez”, nos que “nunca'l so costu supón un problema, buscando mil y una escuses pa xustificalos, cuando realmente lo único que suponen ye apoloxía del militarismu y l'usu de la violencia”. La formación recuerda que mientres el Conceyu gastar perres nesta actividá recorta en solidaridá: “A los mesmos responsables políticos que dicen que nun hai recursos pa l'Ayuda d'Emerxencia Social o pa programes de solidaridá internacional, rompiendo'l compromisu del 0,7 por cientu pa cooperación, nun-yos importa gastar el dineru de los contribuyentes en sofitar al Exércitu español, porque los festivales aéreos pa nada precisen cuntar cola participación de militares”.

Compromisu llama a la ciudadanía a participar na concentración contra’l Festival Aéreo Ciudad de Gijón convocada pola Coordinadora d’ONGD del Principáu d’Asturies a partir de les 10.30 hores nos Xardinos de la Reina. La exhibición va principiar hora y media más tarde y va tener llugar na bahía de la playa de San Llorienzu.