Compromisu denuncia irregularidaes nel Muséu del Pueblu d’Asturies

Compromisu denuncia irregularidaes nel funcionamientu del Muséu del Pueblu d’Asturies qu'obstaculicen el cumplimientu de les obligaciones de la entidá. Ésta ta pendiente de la contratación d'una asistencia téunica nueva, yá en trámites.

Daniel Fernández, voceru de Compromisu na ciudá, afirma que nun se tán respetando los presupuestos municipales y los alcuerdos cola conseyería y el ministeriu. Nesos presupuestos recuéyense les partíes pa personal propio del Muséu del Pueblu d’Asturies y pa modalidaes distintes pa llevar los servicios agora paralizaos por falta de personal.

Compromisu por Xixón considera que “Foro ta desmantelando'l Museu del Pueblu d’Asturies” y de "despíos" la finalización de los contratos vixentes hasta xunu, una situación que condena a la entidá a la inactividá. Amás, afirma que la convocatoria d'asistencia técnica espublizada'l martes nel BOPA nun cubre tolos servicios agora mesmo paralizaos o ensin personal especializao, yá que nun se mencionen dalgunos como l'Archivu de Música Tradicional o'l serviciu de Restauración.

Por too ello esixer “el respetu de los alcuerdos presupuestarios municipales” y piden a Carlos Rubiera, conceyal d'Educación, Cultura, Xuventú y Fiestes, que “los cambios na xestión de la entidá se faigan de forma pública” y non “pela puerta d'atrás”. Tamién que se garantice “la continuidá de tolos proyeutos anguaño paralizaos, y la participación y cumplimientu con otros organismos autonómicos, estatales y mundiales”.