Delles estayes del Muséu del Pueblu d’Asturies, inactives

El Muséu del Pueblu d’Asturies cuenta con estayes ensin actividá tres la non renovación del contratu a los trabayadores. Los responsables de la Fototeca y de los archivos, restauradores y conservadores, afeutaos pola situación.

Según fontes consultaes por Asturies.com, la razón de que se dea esta situación ye la decisión de la conceyalía de Cultura de regular los contratos de trabayu d’estes estayes, yá que dende la Casa Conceyu entienden que les modalidaes de contratación actuales –dalgunes al traviés de beques–, que vienen d’executivos municipales anteriores, nun son les correutes. Los afeutaos por esta decisión son los trabayadores al frente de la Fototeca, l’Archivu de Música Tradicional , l’Archivu de la Tradición Oral, dos conservadores y una restauradora.

L’entornu de los emplegaos d’estes estayes nun entiende la inactividá que ta viviendo dende hai unos meses el Muséu del Pueblu d’Asturies y fala de “un panorama desolador”. Na so opinión, la situación actual pue provocar un "desguace dafechu" de la institución museística no que respeuta a los trabayos d'investigación etnográficos y nagüen por una solución rápida del tema.