Motivos téunicos obliguen a retrasar la estrena de 'El Club Musical'

Unos problemes téunicos obliguen a TPA a retrasar la estrena de ‘El Club Musical’ hasta’l martes próximu. Esti programa, presentáu por Xune Elipe, va tar dedicáu a la escena sonora asturiana y va emitise cada siete díes.

La cita del cantante de Dixebra y responsable de Goxe Producciones colos espectadores de la TPA va ser los martes a les 23.15 hores. “‘El Club Musical’ ye un espaciu que quier ser reflexu de la diversidá, dinamismu y calidá del panorama musical asturianu, mostrando a los grupos y intérpretes nel so hábitat natural: les actuaciones en direuto”, esplica Elipe, persona encargada de conducir un espaciu que va principiar con un reportaxe sobre la banda convidada, pa depués continuar con una entrevista que va dir alternando cola interpretación de dellos cantares. Amás, a lo llargo del programa, van apaecer grafismos con referencies bibliográficos sobre l’estilu musical del grupu.

La llingua vehicular de ‘El Club Musical’ va ser l’asturianu sía cuál sía l’idioma qu’utilicen les bandes nos sos cantares. D’esta forma, preténdese que’l programa sirva, amás de pa promocionar la música fecha nel país, pa dar “normalidá y naturalidá en cuantes al aspectu llingüísticu, rellacionando de pasu al nuestru idioma con un tema ‘modernu’ y ‘contemporaneu’ como pue ser la música más actual”. Esta primer temporada, compuesta por trece capítulos, grabóse na Sala Club del Centru Niemeyer, na Fundación de Música Moderna d’Avilés y nel Teatru El Llar de Corvera. Los grupos convidaos foron Blues & Decker, Lorena Álvarez y su Banda Municipal, Crudo, El Patio de tu Casa, Alexandra in Grey, Toli Morilla, Skama la Rede, Dr. Explosion, Pauline en la Playa, Patrulla Dixie, La Bandina, Misiva y Felpeyu.

Xunto con Elipe, participaron na grabación de los programes Javier Lueje (realizador), Pablo Quiroga y Guillermu Fernández (cámares), Rubén Álvarez (soníu), Tamara Rosa (rexidora), Víctor Vivar (illuminación) y Jorge Cambareli (sintonía), ente otros.

Na semeya, Xune Elipe –a la izquierda– mientres una actuación con Dixebra.