Radio Sele continúa necesitando socios pa garantizar la so viabilidá

La selmana próxima Radio Sele va dar a conocer la decisión definitiva sobre’l so futuru. Tres la celebración d’una reunión, los sos responsables siguen mirando llocales, pero ye necesario sumar más socios pa continuar coles emisiones.

La única radio dafechu n’asturianu nun quier morrer tres 27 años nes ondes y sigue trabayando pa conseguir una base social que permita garantizar les perres necesaries pa cubrir los gastos. Pese a que delles persones respondieron a la llamada d’auxiliu fecha polos responsables de Radio Sele, la cantidá entovía nun ye la suficiente y la selmana próxima va tomase una decisión definitiva sobre’l futuru de la canal.

La cuota mínima de sociu ye de 6 euros al mes, anque hai la posibilidá tamién d’aumentar la cantidá a aportar según les posibilidaes económiques de caún. De conseguir les perres necesaries, la intención de los responsable de la canal ye camudar de llocal p’asina poder recuperar la emisión pela FM. De momento, Radio Sele continúa ufriendo música al traviés d’Internet.