El llunes principia la segunda edición de los veranos lliterarios de Corvera

Paula Pulgar va ser l’autora encargada d’abrir el llunes el Veranu Lliterariu 2013 qu’entama la Casa de la Llingua-Serviciu de Normalización Llingüística de Corvera. Esta actividá tien como oxetu promocionar la llectura infantil n’asturianu.

Tolos llunes de xunetu y agostu, la Biblioteca de Les Vegues va acoyer esta iniciativa de baldre destinada a neños y neñes. Asina, a partir de les 11.30 hores, van poder compartir una hora con dellos autores asturianos que-yos van falar de dalguna de les sos obres; una esperencia prestosa tanto pa los escritores como pa los pequeños, que van poder asina averase a la lliteratura infantil fecha na llingua del país. Nesta primer sesió la convidada ye Pulgar, que va contar los secretos de les ‘Primeres aventures de Pulgu y Yolín’, llibru editáu por AsturtOOns.

Tres la escritora de Piñera Baxo, van participar en Veranu Lliterariu 2013 los autores siguientes: Alberto Álvarez Peña (8 de xunetu), Inaciu Galán (15 de xunetu), ACD (22 de xunetu), Sidoro Villa Costales (29 de xunetu), Xurde Fernández (5 d’agostu), Aránzazu Prado García-Jove (12 d’agostu), RRV (19 d’agostu) y Berto García (26 d’agostu). L’añu pasáu esta actividá del serviciu de normalización corveranu celebróse namái nel mes d’agostu y la primer selmana de setiembre, pero dao l’ésitu de la esperiencia, nesta ocasión decidióse ampliar el programa al mes de xunetu.

Na imaxe, una neña mira llibros infantiles mientres la Feria del Discu y Llibru n'Asturianu celebrada n'Avilés mientres la XXXIV Selmana de les Lletres Asturianes.