Paradores tampoco nun respeta’l topónimu oficial nel so establecimientu nuevu en Courias

La Xunta pola Defensa de la Llingua Asturiana (XDLA) ta acabante de denunciar l’incumplimientu de la toponimia oficial nel establecimientu nuevu de Paradores en Courias. Tampoco nun respeta’l nome de llugar nel de Xixón.

El coleutivu cívicu treslladó esta situación a Paradores hai delles selmanes, ensin respuesta nenguna, polo que da agora’l pasu de facer pública esta situación na que tamién s’alcuentra l’establecimientu asitiúa en Xixón xunto al campu d’El Molinón, que tampoco recueye’l topónimu oficial, nesti casu billingüe. “Solicitamos a Paradores de Turismo de España que rectifique l'error y dea cumplimientu a la toponimia oficial asturiana. De la mesma manera, instamos a la Direición Xeneral de Política Llingüística y al Conceyu de Cangas del Narcea a infomar con urxencia al Ente de Paradores sobre'l cumplimientu inescusable de la llexislación vixente”, demanden dende la XDLA.

El Parador de Courias va tener como sede’l monestariu de la población y va abrir les sos puertes al públicu, si nun hai novedá, pa les fiestes del Carmen, esto ye, pal mes qu’entra. Ésti va ser el tercer Parador que va haber nel territoriu nacional, tres el del Molín Vieyu, en Xixón, y el de Villanueva, en Cangues d’Onís.

Crítica al tratamientu de la TPA a los actos en defensa del idioma

La XDLA tamién critica’l tratamientu que da la TPA a tolos actos en defensa del idioma qu’entama la sociedá civil, lo que se volvió a a demostra cola esposición ’25 años de conciertu en cartelos’ y col XXV Conciertu pola Oficialidá del día 8, al qu’acudieron más de 1.500 persones, escosando’l papel y dexando pequeña la carpa asitiada nel xixonés Parque Inglés. “Too ello a pesar del tratamientu que-yos dieron los medios de comunicación del país, que namás informaron de la cita a posteriori, a pesar de lo noticiable que yera cumplir 25 años y los intentos de boicó del Centru Internacional Niemeyer y del Conceyu d’Uviéu”, aseguren dende’l coleutivu, que centra les sos crítiques na TPA, “un mediu públicu y que d'alcuerdu cola llexislación vixente tien qu’usar y fomentar l’usu del idioma, amás d’atender al interés xeneral de la sociedá asturiana”.

Los informativos de la canal nun acudieron a nengún actu de los convocaos na selmana previa al conciertu, como la inauguración de la esposición o la presentación a los medios de la cita, pero tampoco nun dieron avisu nengún de la so celebración. Namái’l domingu, un día depués, dedicaron unos segundos al eventu na primer edición de ‘TPA Noticias’. Más siguimientu tuvo la ‘caravana del amor’ pa solteros que tuvo llugar en Piloña o a la primer misa del obispu auxiliar d’Uviéu, “a la qu’acudieron 200 persones”. La XDLA recuerda que nun ye la primer vegada que la canal da un tratamientu menor a noticies venceyaes col idioma del país, como la manifestación del Día de les Lletres, y cita actuaciones más qu’indignantes, como cuando los neños y neñes de Mieres cantaron ‘Chalaneru’ xunto con Chus Pedro n’El Requexu, un cantar que pa los periodistes de la TPA ye “más propia de la época de sus padres”.