María del Mar García Poo mostróse crítica con Pedro Sanjurjo por unes declaraciones feches pol socialista con respeuto al asturianu. La diputada de Foro señala que'l PSOE nun tien interés nengún na presencia del idioma na escuela.
El miércoles pasáu, el presidente de la Xunta Xeneral conoció de primer mano l’esmolecimientu de l’Asociación de Padres y Madres del Colexu Público Rural Agrupáu ‘Picos de Europa’, asitiáu en Benia, pola situación delicada na que s’atopaba la materia de Llingua Asturiana, que tien una matriculación cercana al cien por cien nel centru, nel sistema educativu. La respuesta del socialista, seguramente sorprendíu por esta demanda de los padres y madres de la escuela, foi referise a la Constitución y comprometese a “preservar toles variantes” ensin dar el pasu de la oficialidá, según la información que recoyía’l diariu ‘La Nueva España’. Amás, punxo la responsabilidá del caltenimientu del idioma nos falantes, al señalar que lo “verdaderamente importante” pa preservar una llingua ye usala “con naturalidá y de forma habitual”.
Estes declaraciones de Sanjurjo indignaron a FORO, que, al traviés de la diputada García Poo criticó la postura que caltién e PSOE con respeuto situación del idioma nel sistema educativu. “Les declaraciones del presidente del Parllamentu asturianu son otra preba más del desentendimientu de los socialistes pa cola presencia del asturianu na escuela”, afirma la forista, a la que-y sorprende que “la mesma Alministración que se niega de continuu a aplicar la vixente Llei d’usu del Asturianu, que s’enseña inmovilista en cuantes a facilitar la so presencia pública y que, en definitiva, nun ye a enseñar un usu ‘natural y de forma habitual’ del nuestru patrimoniu llingüísticu, pida a los ciudadanos un compromisu qu’ella nun tien”.
FORO entiende que “la defensa del nuestru patrimonio llingüísticu nun ye cosa namás de los ciudadanos” y que “les alministraciones tienen tamién la so responsabilidá”, pa depués destacar que “nel usu cotidianu, na preservación y na promoción del asturianu, la sociedá va mui per delantre de los políticos. Los principios constitucionales nun son declaraciones retoriques: tienen efectos prácticos”. “Con toles torgues que tien l’asignatura de llingua nel actual sistema educativu, les families de los escolinos siguen enseñando un compromisu pa col nuestru patrimoniu llingüísticu más p’alla del de l’Alministración”, añadió García Poo.
Campaña de matriculación
Un día depués de la denuncia pública del Sindicatu Unitariu y Autónomu de Trabayadores de la Enseñanza d’Asturies (SUATEA) a Educación, Cultura y Deporte pola “discriminación permanente” que sufre’l profesoráu asturianu y la situación de la materia de Llingua Asturiana y Gallego-asturiano, la conseyería anunció la puesta en marcha d’una campaña de matriculación na asignatura nos centros escolares. L’ausencia d’una iniciativa d’esti tipu llevó al sindicatu educativu a criticar con dureza a l’Alministración pola so pasividá col idioma del país, yá que les asignatures de francés y alemán, que compiten cola d’asturianu, sí cuenten con propaganda nes escueles.
La campaña a favor de la matriculación en Llingua Asturiana va llevar el nome de ‘#yoapúntome, porque lo llevamos dientro', y va consistir nel repartu de cartelos nos centros públicos y concertaos del país y na divulgación d'un dípticu dixital, que pue consultar nel documentu axuntu d'esta noticia. La vegada última qu’hubo una iniciativa asina foi nel añu 2008, según resalta la propia conseyería.
Adxuntu | Tamañu |
---|---|
![]() | 290.81 KB |