Asturies.com ufre un videu de la manifestación pola oficialidá del XXXIV Día de les Lletres Asturianes

El 3 de mayu, xornada na que se celebró’l XXXIV Día de les Lletres Asturianes, dellos miles de persones salieron a la cai n’Uviéu pa demandar la oficialidá del idioma. Asturies.com ufre un videu de la marcha convocada pola XDLA.

 

Aprovechando que mañana se celebra otra xornada de demanda de respetu a los derechos de los falantes d’asturianu, el XXV Conciertu pola Oficialidá, Asturies.com ta acabante d’espublizar na so canal en Youtube un videu editáu por Alejandro Salueña García con imáxenes de la manifestación de la Xunta pola Defensa de la Llingua Asturiana (XDLA) pol Día de les Lletres. La música de la pieza correspuende al cantar ‘Camín’, del discu ‘Llume’ de Xera.

 

Nesa xornada, dellos miles de persones, 5.000 según la organización, percorrieron la distancia ente la Estación del Norte (RENFE) y el Teatro Campoamor ente glayíos de ‘oficialidá’. L’Asamblea de Maestros de Llingua Asturiana y Gallego-asturiano, Izquierda Xunida, CC OO Enseñanza, Reciella, FETE-UXT, CSA La Semiente, un grupu de falantes de gallego-asturiano, Iniciativa pol Asturianu, SUATEA, Compromisu por Asturies, Andecha Astur y CSI, sofitaron esta marcha.